April 2, 2018

ಲಂಕಾದಹನ


ಲಂಕಾ ಪಟ್ಟಣ ತುಂಬಾ ಸುಂದರ ವಾಗಿತ್ತು . ಮನೆಗಳಿಗೆ  ಚಿನ್ನದ ತರ ಕಾಣೋ ಹಾಗೆ  ಬಣ್ಣ ಹಚ್ಚಿದ್ರು .
ಅರಮನೆಗಳಂತೂ  ತುಂಬಾ ಚೆಂದ ಚೆಂದ ಇದ್ವು . 
ಹನುಮಂತ ಒಂದು ಕೋತಿ ರೂಪದಲ್ಲಿ  ಆ ಅರಮನೆಗಳನ್ನೆಲ್ಲ ಮುಂಚೆ ಹುಡುಕದ . ಅಲ್ಲೆಲ್ಲೂ ಸೀತೆ ಕಾಣಿಸಲಿಲ್ಲ . 

ಹಾಗೆ  ಹುಡುಕ್ತಾ ಹುಡುಕ್ತಾ  ಅಶೋಕ ವನದ ಹತ್ರ ಬಂದ .

"ಅದೆನಜ್ಜಿ  ಅಶೋಕ ವನ?  "

"ಅದು ಕಬ್ಬನ್ ಪಾರ್ಕ್, ಲಾಲ್ ಬಾಗ್ ತರ ನೇ ದೊಡ್ಡ ಗಾರ್ಡನ್ ಕಣೆ.   ಅಲ್ಲಿ ಒಂದು ದೊಡ್ಡ ಮರದ ಕೆಳಗೆ ಒಬ್ಬ ಚೆಂದದ ಹೆಂಗಸು ಕಾಣಿಸಿದಳು  ಹನುಮಂತಂಗೆ . ಅಳ್ತಾ ಕೂತಿರೋ  ಅವಳ ಸುತ್ತ   ಸುಮಾರು ಜನ ಹೆಂಗಸರಿದ್ರು . ಆದರೆ ಆ ಹೆಂಗಸು  ಬೇರೆ ಯಾರತ್ರನೂ ಮಾತಾಡದೆ ಇರೋದನ್ನ ನೋಡಿ  ಅವಳೇ ಸೀತೆ ಇರಬೇಕು ಅಂದ್ಕೊಂಡ . ಅವಳು ಕೂತಿರೋ ಮರದ ಕೊಂಬೆ ಮೇಲೆ  ಅಡಗಿ ಕೂತ್ಗೊಂಡು ನೋಡ್ತಾ ಇದ್ದ . 

" ಅವಳೇ ಸೀತೆ  ಗ್ಯಾರಂಟಿ ಆಲ್ವಾ ಅಜ್ಜಿ? ಅವಳಿಗೆ ಭಾಷೆ ಬರ್ತಾ ಇರಲಿಲ್ಲವಲ್ಲಾ ಅದಕೆ ಯಾರತ್ರು ಮಾತಡ್ತಿರಲಿಲ್ಲ ಅವಳು . ಆಲ್ವಾ ಅಜ್ಜಿ ? "   ಅಪೂರ್ವಾ ಮುಖ ಅರಳಿತ್ತು .

"ಈಗ ಮೊಬೈಲ್ ನಲ್ಲಿ ಟ್ರಾನ್ಸ್ ಲೇಟರ್ ಹಾಕೊಂಡ್ರೆ ಯಾವ್ ಭಾಷೆ ಬೇಕಾದ್ರೂ ಅರ್ಥ ಮಾಡ್ಕೊಬಹುದು !  ಅದ್ಕೆ  ಟೆಕ್ನಾಲಜಿ  ಬೇಕು ಅನ್ನೋದು .. " ವರುಣ್  ಇನ್ನೂ ಏನೋ ಹೇಳ್ತಾ ಇದ್ದ . ಆದರೆ ಅಜ್ಜಿ ಗಮನ ಕೊಡದೆ ಮುಂದುವರೆಸಿದರು .

"ಹ್ಞೂ ಕಣೆ .  ಅಷ್ಟೊತ್ತಿಗೆ ಅಲ್ಲಿಗೆ   ರಾವಣ  ಬಂದ .  ಸೀತೆ  ಎದುರು ನಿಂತು " ನೋಡು ನೀನೆಷ್ಟೇ ಅತ್ತು ಕರೆದು  ಮಾಡಿದ್ರೂ, ಉಪವಾಸ ಇದ್ರೂ  ಏನೂ ಆಗಲ್ಲ ! ನಿನ್ನ ರಾಮ ಇಲ್ಲಿ ಬರೋದು ಸಾಧ್ಯ ನೇ ಇಲ್ಲ .  ಅವನು ಬಂದರೂ ಕೂಡ ನನ್ನ ಸೈನ್ಯದ ಎದುರು ಅವನಿಗೆ  ಗೆಲ್ಲೋಕೆ ಆಗಲ್ಲ . ಹೀಗಾಗಿ ಸುಮ್ನೆ  ನಾ ಹೇಳಿದ್ದು ಕೇಳು . ಈ ಹಠ ಎಲ್ಲ ಬಿಟ್ಟು ನನ್ನ ಮದ್ವೆ ಆಗಿ ರಾಣಿ ತರಾ ಸುಖವಾಗಿರು " ಅಂದ .

"ಆದ್ರೆ , ಸೀತೆ ಗೆ ಆಲ್ ರೆಡಿ  ಮದ್ವೆ ಆಗಿದ್ಯಲ್ಲ ಅಜ್ಜಿ ?  ಮತ್ತೆ ? "
" ಹೌದಮ್ಮ , ಆದ್ರೆ ರಾವಣ ಅದೆಲ್ಲ ವಿಚಾರ ಮಾಡ್ತ ಇರ್ಲಿಲ್ಲ . ಅವನು ಹೀಗೆ ಹೇಳ್ತಾ ಇದ್ರೆ ಸೀತೆ  ಅವನ ಕಡೆ ನೋಡಲೂ ಇಲ್ಲ . ನೆಲದ ಮೇಲೆ ಬಿದ್ದಿದ್ದ ಒಂದು ಹುಲ್ಲು ಕಡ್ಡಿ  ಕಡೆ ನೋಡ್ತಾ "  ನೋಡು ನೀನು  ಎಷ್ಟೇ ಪ್ರಯತ್ನ ಮಾಡಿದ್ರೂ  ನಾನು ನಿನ್ನ ಮಾತನ್ನು ಒಪ್ಪೋದು ಸಾಧ್ಯ ಇಲ್ಲ . ನನ್ನ ಕದ್ಕೊಂಡು ಬಂದು ತುಂಬಾ ದೊಡ್ಡ ತಪ್ಪು ಮಾಡಿದೀಯಾ. ನನ್ನ ರಾಮ ಬಂದೆ ಬರ್ತಾನೆ . ನಿನ್ನ ಕೊಂದು , ನನ್ನ ಇಲ್ಲಿಂದ ಕರ್ಕೊಂಡು ಹೋಗ್ತಾನೆ . ಆ ಭರವಸೆ ನನಗಿದೆ  "  ಅಂತ ಹೇಳಿದಳು . ಅದನ್ನ ಕೇಳಿ ರಾವಣ ಸಿಟ್ಟು ಮಾಡ್ಕೊಂಡು  ಹೊರಟು ಹೋದ .

ರಾತ್ರಿ  ಸೀತೆ ನಾ  ಕಾಯ್ತಾ ಇರೋ ಹೆಂಗಸರೆಲ್ಲ  ಮಲಗೊವರೆಗೂ  ಹನುಮಂತ  ಕಾದಿದ್ದು ,  ಆಮೇಲೆ  ಸೀತೆಯ ಎದುರು ಹೋಗಿ ನಿಂತ .
ಹೆದರಿದ ಅವಳು ,  ಇವನು ಯಾರೋ ರಾಕ್ಷಸನೇ  ಕೋತಿ ತರ ಬಂದಿದಾನೆ ಅಂದ್ಕೊಂಡಳು. 
ಅವಳ ಮುಂದೆ ನಿಂತ  ಹನುಮಂತ ತನ್ನ ಕೈಲಿರೋ  ರಾಮನ ಉಂಗುರ ನಾ  ಅವಳೆದುರು ಹಾಕಿ  ಕೈಮುಗಿದ . ಅದನ್ನು ನೋಡ್ತಿದ್ದ ಹಾಗೆ  ಸೀತೆ  ಕಣ್ಣಲ್ಲಿ ನೀರು ಬಂತು. 
ಉಂಗುರನಾ  ಎತ್ಕೊಂಡು  ಯಾರು ನೀನು ?  ಇದು ನಿನ್ ಹತ್ರ ಹೇಗ್ ಬಂತು ?  ಅಂತ ಕೇಳಿದಳು . 
"ತಾಯಿ , ನಾನು ಹನುಮಂತ .  ನಿನ್ನನ್ನ ಹುಡುಕಿಕೊಂಡು ಬರ್ತೀನಿ  ಅಂತ ಶ್ರೀರಾಮನಿಗೆ  ಮಾತು ಕೊಟ್ಟು ಬಂದಿದೀನಿ. ಅವನು ಈಗ ಕಿಷ್ಕಿಂಧೆಲಿ ಇದ್ದಾನೆ. ನಿನ್ನನ್ನು ನೋಡಿ ನಂಗೆ ತುಂಬಾ ಸಮಾಧಾನ ಆಯ್ತು. ನೀನು  ನನ್ನ ಭುಜದ ಮೇಲೆ ಕೂತ್ಕೋ ನಾನು ಸೀದಾ ರಾಮನ ಹತ್ತಿರ ನಿನ್ನನ್ನು ಕರ್ಕೊಂಡು ಹೋಗ್ತೀನಿ "  ಅಂತ ಹೇಳಿದ .

ಅದಕ್ಕೆ ಸೀತೆ ,  " ಹನುಮಂತಾ, ನಂಗೆ ಇದನ್ನ ಕೇಳಿ ತುಂಬಾ ಖುಷಿ ಆಯ್ತು. ಆದ್ರೆ ಶ್ರೀ ರಾಮನೇ  ಬಂದು  ಈ ರಾವಣನ ಕೊಂದು ನನ್ನ ಇಲ್ಲಿಂದ ಕರ್ಕೊಂಡು ಹೋಗ್ಬೇಕು . ಅದೇ ಸರಿ ! " ಅಂತ ಹೇಳಿದಳು .
ಈಗ ನೀನು ನನ್ನನ್ನು ಭೇಟಿಯಾದೆ  ಅಂತ  ಈ ಆಭರಣ ಣ ರಾಮನಿಗೆ ಕೊಡು "  ಅಂತ  ತನ್ನ ತಲೇಲಿ ಇದ್ದ ಒಂದು ಚಿನ್ನದ ಹೂವನ್ನ  ಹನುಮಂತನಿಗೆ  ಕೊಟ್ಟಳು . 

"ಅಜ್ಜಿ , ಅಜ್ಜಿ ಅವಳತ್ರ ಚಿನ್ನದ ಹೂ ಹೇಗ್  ಬಂತು ? ಮನೆಯಿಂದ ಹಾಕ್ಕೊಂಡೆ ಬಂದಿದ್ಲಾ?  ಅದನ್ನ ಯಾರೂ ಕಿತಗೊಂಡೇ ಇಲ್ವಾ?"  ಅಪೂರ್ವಾ ಪ್ರಶ್ನೆ !

"ಅವಳ  ಜಡೆ ಲೆ ಇತ್ತು ಕಣೆ . ಅದನ್ನೆಲ್ಲ ಹಾಗೆ ಯಾರೂ ಕಿತ್ಗೋತಿರಲಿಲ್ಲ. " ಜಾಸ್ತಿ ವಿವರಣೆ ಕೊಡೋಕೆ ಹೋಗದೆ ಅಜ್ಜಿ ಮುಂದುವರಿಸಿದರು .
ಸರಿ ಅದನ್ನ ತೊಗೊಂಡು  ಹನುಮಂತ  ಅವಳಿಗೆ ನಮಸ್ಕಾರ ಮಾಡಿ ಅಲ್ಲಿಂದ ಹೊರಟ .  ಸುಮ್ನೆ ಯಾಕೆ ಹೋಗೋದು ಸ್ವಲ್ಪ ಕೀಟಲೆ ಮಾಡೋಣ ಅನಿಸ್ತು ಅವನಿಗೆ.  ಅಶೋಕವನ ಅಂದ್ರೆ ರಾವಣನಿಗೆ ತುಂಬಾ ಪ್ರೀತಿ ಅಂತ  ಗೊತಾಗಿತ್ತು ಅವನಿಗೆ.  ಹೀಗಾಗಿ , ಅದನ್ನ ಹಾಳು ಮಾಡೋಕ್ ಶುರು ಮಾಡಿದ.  ಹೂವೆಲ್ಲ  ಕಿತ್ತು, ಮರ-ಗಿಡಗಳನ್ನೆಲ್ಲ  ಮುರಿದು  ಹಾಳು ಮಾಡಿದ. 

"ಅಜ್ಜಿ, ಅದನ್ನೆಲ್ಲ ಯಾಕೆ ಹಾಳು ಮಾಡೋದಜ್ಜಿ ? ಪಾಪ ಅವೇನು ಮಾಡಿದ್ವು ? ಹಾಗೆಲ್ಲ ಗಿಡ ಹಾಳು ಮಾಡಬಾರದು ಅಂತ  ಅಮ್ಮ ಬೈತ ಇರ್ತಾಳೆ. "

ಹೂ ಕಣೆ. ಅವನು ಮಾಡಿದ್ದು ತಪ್ಪೇ. ಆದರೆ ಅವನಿಗೆ ರಾವಣನ ಹತ್ರ ಹೋಗೋಕೆ ಕಾರಣ ಬೇಕಿತ್ತು.  ಇದೆಲ್ಲ ನೋಡಿ ಸೈನಿಕರು  ಅವನ್ನ ಹಿಡಿದು ರಾವಣನ ಎದುರು ನಿಲ್ಸಿದ್ರು. 

ತನ್ನ ಪ್ರೀತಿಯ ಅಶೋಕವನವನ್ನು  ಹಾಳುಮಾಡಿದ ಅಂತ  ರಾವಣಂಗೆ ತುಂಬಾ ಕೋಪ ಬಂದಿತ್ತು . ಹನುಮಂತನನ್ನು ನೀ ಯಾರು? ಎಲ್ಲಿಂದ ಬಂದೆ? ಅಶೋಕವನನಾ ಯಾಕೆ ಹಾಳುಮಾಡಿದೆ ಅಂತೆಲ್ಲ  ಕೇಳಿದ . 
ಹನುಮಂತ , ತಾನು ರಾಮನ ಕಡೆಯವನು , ಸೀತೇನ ಹುಡುಕ್ಕೊಂಡು ಬಂದಿದೀನಿ , ಅವಳಿಗೆ ಏನೂ ತೊಂದ್ರೆ ಕೊಡದೆ ವಾಪಸ್ ಕಳಿಸಿಕೊಡು , ಇಲ್ಲಾಂದ್ರೆ ,ರಾಮ  ಯುದ್ಧ ಮಾಡಿ ನಿನ್ನ ಸಾಯಿಸ್ತಾನೆ  ಅಂತ ಹೇಳಿದ . 
ಅದಕ್ಕೆ ರಾವಣ ಜೋರಾಗಿ ನಕ್ಕು , ನಿನಗೆ ನನ್ನತ್ರ ಹೀಗೆ ಮಾತಾಡೋ ಅಷ್ಟು ಧೈರ್ಯನಾ  ಅಂತ  ಬೈದು , ತನ್ನ ಸೇವಕರಿಗೆ  ಹನುಮಂತನ ಬಾಲಕ್ಕೆ ಬೆಂಚಿ ಹಚ್ಚಿ  ಕಳಿಸೋಕೆ ಹೇಳಿದ . 

ರಾವಣನ ಸೇವಕರು  ಬಾಲಕ್ಕೆ ಬೆಂಚಿ ಹಚ್ಚಬೇಕು  ಅಂತ ಬಂದಾಗ , ಹನುಮಂತನ ಬಾಲ ಉದ್ದ ಬೆಳಿತಾ ಹೋಯ್ತು ! 

"ಅಜ್ಜಿ,  ಅದು ಹ್ಯಾಗೆ ಅಜ್ಜಿ ?  ಅದೇನು  ಗಿಡ -ಬಳ್ಳಿ ತರ ನ? ಬೆಳಿಯೋಕೆ ?  " ಆದಿತ್ಯ ಕೇಳಿದ 

" ಏಯ್ , ಒಂಥರಾ ಎಲಾಸ್ಟಿಕ್ ಆಗಿರಬೇಕು ಕಣೋ " ಜೋರಾಗಿ ನಕ್ಕು ಹೇಳಿದ ವರುಣ್  ತಕ್ಷಣ ಅಜ್ಜಿ ಕೋಪದ ನೆನಪಾಗಿ  "ಸಾರಿ ಅಜ್ಜಿ ಅಂತ ಸುಮ್ಮನಾದ. 

" ಅಜ್ಜಿ, ನಾನು ಇದನ್ನ ನೋಡಿದೀನಿ ಟಿವಿ ಲಿ "  ಎಕ್ಸೈಟ್ ಆಗಿ ಅಪೂರ್ವ ಹೇಳಿದಳು ."  ಬಾಲಕ್ಕೆ ಬೆಂಕಿ ಹಚ್ಚಿಕೊಂಡು  ಹನುಮಂತ .... " ಮುಂದುವರೀತಾ ಇತ್ತು 

" ಸುಮ್ನಿರೆ ,ಅಜ್ಜಿನೆ ಹೇಳ್ಲಿ . ನೀನು ಟಿ ವಿ ಲಿ ನೋಡಿದ್ದು ಈಗ ಹೇಳಬೇಡ "   ತಂಗಿಗೆ  ಗದರಿದ ಆದಿತ್ಯ 
" ಹ್ಮಂ...  ಹನುಮಂತನ ಬಾಲ  ಬೆಳಿತಾ ಹೋಯ್ತು !  ಲಂಕೆಲಿ ಇರೋ ಬಟ್ಟೆನೆಲ್ಲ ಸುತ್ತಿದರು ಮುಗೀಲಿಲ್ಲ .ಅವರು ಎಷ್ಟು ಸುತ್ತೊಕಾಯ್ತೋ ಸುತ್ತಿ ಹಾಗೆ ಎಣ್ಣೆ ಸುರಿದು ಬೆಂಕಿ ಹಚ್ಚಿದರು .  ಹನುಮಂತ ಅಲ್ಲಿಂದ ಹೊರಗೆ ಹಾರಿದ . ಲಂಕೆಯಲ್ಲಿರೋ  ದೊಡ್ಡ ದೊಡ್ಡ ಮನೆಗಳ ಮೇಲೆಲ್ಲಾ ಹಾರಿ ಎಲ್ಲಾ ಕಡೇ ಬೆಂಕಿ ಹಚ್ಚಿ ಬಿಟ್ಟ . ಇಡೀ ಲಂಕಾ ಪಟ್ಟಣ ನೆ  ಉರಿಯೋಕೆ ಶುರುವಾಯ್ತು !  " 

"ಅಜ್ಜಿ ,  ಯಾಕಜ್ಜಿ ಅವನು ಹಾಗೆ ಮಾಡ್ಬೇಕು ?  ರಾವಣ ತಪ್ಪು ಮಾಡಿದ್ದು ತಾನೇ ? ಅವನ ಅರಮನೆ ಮಾತ್ರ ಸುಡ ಬೇಕಿತ್ತು . ಪಾಪ ಬೇರೆವ್ರೆಲ್ಲ ಅವರ ಮನೆ ಸುಟ್ಟು ಹೋದ್ರೆ   ಏನ್ ಮಾಡ್ತಾರೆ ?  ಇದು ಸರಿ ಅಲ್ಲ ಅಜ್ಜಿ  "   ಅಪೂರ್ವಾ  ಅಳು ಧ್ವನಿಲಿ ಹೇಳಿದಳು . 

" ಹಾಗೆ ಮಾಡಿದ್ರೆ , ರಾವಣ ತನ್ನ ತಪ್ಪನ್ನ ತಿದ್ಕೊಬಹುದು ಅಂತ ಆಗಿತ್ತಮ್ಮ ಅದು . ಬಿಡು ನಾವೇನು ಮಾಡೋಕಾಗಲ್ವಲ್ಲ ಈಗ . ನೀ ಮುಂದೆ ಕಥೆ ಕೇಳು . ಅಜ್ಜಿ ಮೊಮ್ಮಗಳನ್ನು ಸಮಾಧಾನ ಮಾಡಿದರು . 
" ಲಂಕಾ ಪಟ್ಟಣ ಕ್ಕೆ ಬೆಂಕಿ ಹಚ್ಚಿದ  ಹನುಮಂತ  ತನ್ನ ಬಾಲನ ಸಮುದ್ರದಲ್ಲಿ ಅದ್ದಿ ಬೆಂಕಿ ಆರಿಸ್ಕೊಂಡ . 
ಆಮೇಲೆ , ಅಲ್ಲಿಂದ ಪುನಃ ಜಿಗಿದು ಕಿಷ್ಕಿಂಧೆಗೆ ವಾಪಸ್ ಹೋದ.  "

" ಅಜ್ಜೀ , ಅವನ ಬಾಲ ಸುಟ್ಟು ಹೋಗಲಿಲ್ವಾ ? ಉರಿಲೂ ಇಲ್ವಾ ಅವನಿಗೆ?  ನಂಗೆ ಬೆಳಿಗ್ಗೆ ಅಮ್ಮ ಹಾಲಿನ ಲೋಟ ಕೊಟ್ಳಲ್ಲ , ಅದರಲ್ಲಿ ಕೆನೆ ಸರಿಸೋಕೆ  ಹೋದೆ , ಬೆರಳು  ಸುಟ್ಟೋಗಿ ಇನ್ನೂ ಉರಿತಾ ಇದೇ ... " 

" ಸುಮ್ನಿರೇ ,ಉಗುರು ಬೆಚ್ಚಗೆ ಕೂಡ ಇರ್ಲಿಲ್ಲ ಹಾಲು , ಬೆರಳು ಸುಡ್ತಂತೆ " ಸ್ಮಿತಾ ಸಿಡುಕಿದಳು 
" ನಿಂಗೊತ್ತಿಲ್ಲ ಸುಮ್ನಿರು  ಎಂದು ಅಮ್ಮನಿಗೆಮೂತಿ ತಿರುವಿದ ಅಪೂರ್ವಾ " ಅಜ್ಜೀ , ಮುಂದೆ ಹೇಳು "  ರಾಗ ಎಳೆದಳು.
" ವಾಪಸ್ ಬಂದ ಹನುಮಂತ  ಸೀದಾ ರಾಮನ ಹತ್ತಿರ ಹೋದ . ಅವನಿಗೆ ನಮಸ್ಕಾರ ಮಾಡಿ  ಸೀತೆಯ ವಿಷಯವನ್ನೆಲ್ಲ ಹೇಳಿದ . ಹಾಗೆ ಅವಳು ಕೊಟ್ಟಿದ್ದ ಚೂಡಾಮಣಿ ನು ರಾಮನಿಗೆ ಕೊಟ್ಟ .ಅದನ್ನು ನೋಡಿ , ಸೀತೆ ಅಳ್ತಾ ಇರೋ ಸುದ್ದಿನೆಲ್ಲ ಕೇಳಿ ರಾಮನಿಗೂ ಅಳು ಬಂದು ಬಿಡ್ತು .  " 

" ಪಾಪ ಆಲ್ವಾ ಅಜ್ಜಿ? ನಂಗೂ ಅಳು ಬರ್ತಿದೆ . ಹನುಮಂತ ಲಂಕೆನೆಲ್ಲ ಸುಟ್ಟಾಕಿದ ಅಂತ ಕೋಪಕ್ಕೆ ರಾವಣ ಸೀತೆ ನ ಸಾಯಿಸಿ ಬಿಟ್ರೆ ? " 

" ಹೇಯ್ ಅಳುಬುರ್ಕಿ , ಆ ತರ ಏನೂ ಆಗಲ್ಲ. ಸುಮ್ನೆ ಕಥೆ ಕೇಳೆ"  ವರುಣ್ ಬೈದ . 
" ರಾಮ -ಲಕ್ಷ್ಮಣ ಇಬ್ರೂ ಸುಗ್ರೀವನ ಹತ್ರ ಮಾತಾಡಿ ,  ಲಂಕೆಗೆ ಯುದ್ಧಕ್ಕೆ ಹೋಗೋದು ಅಂತ  ತೀರ್ಮಾನ ಮಾಡಿದ್ರು . ಒಂದೇ  ದೊಡ್ಡ ತೊಂದ್ರೆ ಅಂದ್ರೆ ಸಮುದ್ರ ದಾಟೋದು !  ಆ ಬಗ್ಗೆನೇ ಯೋಚನೆ ಮಾಡ್ತ  ಸಮುದ್ರ ತೀರದ ವರೆಗೂ ಹೋದ್ರು .


 ಹಿಂದಿನ ಕಂತುಗಳು 




March 11, 2018

ಪ್ರಯಾಣ





ಇಲ್ಲಿಯ ಲೋಕಲ್ ಟ್ರೈನ್  ನಲ್ಲಿ 
ಬಾಗಿಲೆದುರೆ ಇಟ್ಟ ಎರಡು ಬುಟ್ಟಿ
ಒಂದರಲ್ಲಿದೆ ಮೀನು  ಇನ್ನೊಂದರಲ್ಲಿ  ಹೂವು !
ಅದರತ್ತಿತ್ತ ಚೆಲ್ಲಿದ ಶೇಂಗಾ ಸಿಪ್ಪೆ 
ಕಾಲಿಟ್ಟರೆ ಅಡಿಗೆ ಸಿಕ್ಕಿದ ಪ್ಲಾಸ್ಟಿಕ್ ನ ಚರಪರ
ತೊಂದರೆ ಇಲ್ಲ ಬಿಡಿ , ಕಾಲಿಡಲಾದರೂ  ಜಾಗವೆಲ್ಲಿ ?

ತುಸುವೇ ಜಾಗ ಸಿಕ್ಕರೂ  ಅಲ್ಲೇ ಕುಳಿತು
ಕಾರ್ಡು  ಹಚ್ಚುವವರಿಗೂ ಕೊರತೆಯಿಲ್ಲ 
ನಿಂತೇ ಬೇಕಾದರೂ ಆಟಿನ್ ರಾಣಿ,  ಇಸ್ಫೀಟು ಎಕ್ಕಾ 
ಎನ್ನುತ್ತಾ ಸಂಭ್ರಮಿಸುತ್ತಾರೆ .

ಅಲ್ಲಿಯೇ ಎಲ್ಲೋ ಒತ್ತಿಕೊಂಡು 
ಒಳ ತೂರಿದ ಪುಟ್ಟ ಹುಡುಗ 
ಕೂದಲಿಲ್ಲದವರೆದುರಿಗೂ  ಬಾಚಣಿಕೆ ಹಿಡಿಯುತ್ತಾನೆ 
ಸುರಿಯುವ ಮೂಗನ್ನು
ಜೋಲುವ ಅಂಗಿಯ ತೋಳಿಗೆ 
 ಉಜ್ಜಿಕೊಳ್ಳುತ್ತಾನೆ

ಇನ್ನು ಲೇಡೀಸ್ ಬೋಗಿಯನ್ನೇನು ಕೇಳೋಣ 
ಮನೆಯಿಂದ ಹೊರಡುವಾಗ 
ಪೂಸಿಕೊಂಡ ಸೆಂಟು 
ಬೋಗಿ ಹತ್ತುವ ವರೆಗೂ ಜೊತೆಯಲ್ಲೇ ಇತ್ತು 
ಒಳಗೆ  ಹತ್ತೆಂಟು  ವಾಸನೆಗಳ ನಡುವೆ 
ಎಲ್ಲೋ ಸೇರಿ ಹೋಯ್ತು  
ಸೀಟು ಸಿಕ್ಕಿದರೆ  ಕುಳಿತು ಬಿಡಿಸ ಬಹುದು  ಬಟಾಣಿ 
ಮಾತಾಡುತ್ತಲೇ ತರಕಾರಿ ಹೆಚ್ಚಿದರೆ 
ಅಡುಗೆ ಸಲೀಸು 
ಪಕ್ಕದವಳ ಸೀರೆಯ ಬಗ್ಗೆ ವಿಚಾರಿಸುವಾಗಲೇ 
ಬರುತ್ತಾಳೆ ಕೆದರು ಮಂಡೆಯ ಪೋರಿ , 
ಸೀರೆ ಪಿನ್ನು ತೊಗೋ ಅಕ್ಕಾ ಎಂದು 
ಅವಳ ಹರಿದ ಲಂಗಕ್ಕೊಂದೆರಡು ಪಿನ್ನು ಬೇಕು 

ಮನೆಯಿಂದ  ಕೆಲಸಕ್ಕೆ , ಶಾಲೆ- ಕಾಲೇಜಿಗೆ 
ನಿತ್ಯ ಹೋಗಿ ಬರುವಾಗ  ಈ ಪ್ರಯಾಣದಲ್ಲೇ
ಹುಟ್ಟುತ್ತವೆ , ಬೆಳೆಯುತ್ತವೆ ,ಬಾಂಧವ್ಯಗಳು 
ಜಾತಿ, ಮತ , ವಯಸ್ಸಿನ ಭೇದವಿಲ್ಲದೆ 
ಮೇಲು ಕೀಳೆನ್ನದೆ ಎಲ್ಲರನ್ನೂ ಎಲ್ಲವನ್ನೂ 
ಹೊಟ್ಟೆಯಲ್ಲೇ ಹೊತ್ತು  ಮುಂದೋಡುವ 
ಲೋಕಲ್  ಟ್ರೈನಿನೆದುರು  
ಭಗವಂತನೂ ಬೆರಗಾಗಿದ್ದಾನೆ 






February 14, 2018

ನೀ ನಕ್ಕಾಗ !





ಅಂದು ನೀ ನಕ್ಕಾಗ ಸಂಜೆಯಲಿ ಕೆಂಪಿತ್ತು  
ತಿಂಗಳನ ಅಂಗಳದಿ ಬೆಳದಿಂಗಳರಳಿತ್ತು
ಮಲ್ಲಿಗೆಯ ಮಂಟಪದಿ  ಪರಿಮಳವು ಹರಡಿತ್ತು 
ಚೆಂಗುಲಾಬಿಯು ಮುಳ್ಳ ನಡುವೆಯೂ ಬಿರಿದಿತ್ತು 
ನಿನ್ನ ಕಣ್ಣೋಟದಲಿ ಮಾದಕತೆ ತುಳುಕಿತ್ತು
ಬಳಿಗೆ ಬಾ ಎನ್ನುತಲಿ ನನ್ನನ್ನು ಕರೆದಿತ್ತು 
ಕಾಲಗೆಜ್ಜೆಯ ನಾದ ಎದೆಯ ಝಲ್ಲೆನಿಸಿತ್ತು 
ನನ್ನುಸಿರೇ ನೀನಾಗಿ ಎದೆಯ ತುಂಬಿರುವಾಗ
ಭೂಮಿ-ಬಾನೆಲ್ಲವೂ ಒಂದಾಗಿ  ನಲಿದಿತ್ತು

February 7, 2018

ಸೀತಾಪಹರಣ - ೪




ಬೆಳಿಗ್ಗೆ ಸ್ಕೂಲಿಗೆ  ಹೊರಡೋವಾಗ  ಅಪೂರ್ವಾ ' ಅಜ್ಜಿ , ಇವತ್ತು ಸಂಜೆ ಕಥೆ ಮುಂದುವರಿಸಬೇಕು . ನೆನಪಿದೆ ತಾನೇ ? " 
" ನೆನಪಿದೆ ಕಣೆ . ನೀನೀಗ ಶಾಂತಿಯಿಂದ ಹೋಗು  " 

"ಅಜ್ಜಿ ನಾವು ಬರೋವರೆಗೂ  ಶುರು ಮಾಡಬೇಡ  ಮತ್ತೆ" . ಗಂಡು ಮಕ್ಕಳಿಬ್ಬರೂ  ಹೇಳಿದರು . 

ಮಕ್ಕಳು ಹೋದಮೇಲೆ  ಆಫೀಸಿಗೆ ರೆಡಿ ಆಗುತ್ತಿದ್ದ  ಸ್ಮಿತಾ  ಹೇಳಿದಳು. " ಅತ್ತೆ , ನೀವು ಇವತ್ತು ಬೇಕಾದ್ರೆ  ಉಷಾ ಮನೆಗೆ ಹೋಗಿ ಸಂಜೆ. " ಇಲ್ಲ ಅಂದ್ರೆ ಈ ಮಕ್ಕಳು ನಿಮ್ಮ ಜೀವ ಹಿಂಡ್ತಾರೆ . ಕಥೆ ಕಥೆ ಅಂತ .  ಹೇಳಿದ್ದು ಸುಮ್ಮನೆ ಕೇಳೋದಿಲ್ಲ ಬೇರೆ ತರಲೆಗಳು  ! " 

ಅಜ್ಜಿ ನಕ್ಕು ಬಿಟ್ಟರು . " ಇರಲಿ ಬಿಡೆ . ಏನೋ ಆಸಕ್ತಿಯಿಂದ ಕೇಳ್ತಾರಲ್ಲ ! ಇಲ್ಲ ಅಂದ್ರೆ , ನಮ್ಮ ಪುರಾಣಗಳು  ಇವರಿಗೆ ಗೊತ್ತಗೊದಾದ್ರು ಹೇಗೆ ?  ನಮ್ಮ ಕಾಲದ ಹಾಗೆ ಅಲ್ಲ ಈಗ. ಅವರಿಗೆ  ನೂರಾ ಎಂಟು  ಪ್ರಶ್ನೆ  ಬರತ್ತೆ ತಲೇಲಿ . ಕೇಳ್ತಾರೆ . ಅವರಿಗೆ ಅರ್ಥ ಮಾಡ್ಸೋದು ನಮ್ಮ ಕರ್ತವ್ಯ.  ಅಲ್ಲದೆ , ಕೆಲವು ಸಲ ನಾವೇ  ಯೋಚನೆ ಮಾಡೋ ತರ ಪ್ರಶ್ನೆ ಕೇಳ್ತಾರೆ . ಒಳ್ಳೇದು ಬಿಡು !  "
 ಹಾಗೆ ಹೇಳಿದರೂ ಅಜ್ಜಿ ಒಳಗೆ ಯೋಚನೆ ಮಾಡ್ತ ಇದ್ರೂ. 
ಕಥೇಲಿ ಏನೇನು ಸಣ್ಣ ಪುಟ್ಟ ಬದಲಾವಣೆಗಳು ಬೇಕಾಗ ಬಹುದು , ಯಾವ   ಭಾಗಗಳನ್ನ  ಹೇಳದೆ ಇದ್ದರೆ ಒಳ್ಳೇದು  ಎಂದು ಅವರ ತಲೇಲಿ  ವಿಚಾರ ನಡೀತಾ ಇತ್ತು . 

ಸಂಜೆ , ಶಾಲೆಯಿಂದ ಬಂದ ಮಕ್ಕಳು  ಬಾಗಿಲಿಂದಲೇ  " ಅಜ್ಜೀ , ಕಥೆ .... "  ಕೂಗಿಕೊಂಡರು 
"ಅಯ್ಯೋ , ಕೈ ಕಾಲು ತೊಳೆದು , ಬಟ್ಟೆ ಬದಲಾಯ್ಸಿ ಮೊದ್ಲು .  ಹೊಟ್ಟೆಗೆ ಏನಾದ್ರೂ ಹಾಕ್ಕೊಂಡ್ ಬನ್ನಿ  " 
ಅಜ್ಜೀ... ನೀನು ಕುರ್ಚಿ ಹಾಕ್ಕೊಂಡು ಕೂತ್ಗೊಳೋ ಹೊತ್ತಿಗೆ ನಾವು ಬಂದುಬಿಡ್ತೀವಿ . ಓಡಿದಳು ಅಪೂರ್ವಾ . 

ನಿಧಾನನೆ ಬನ್ನಿ ಪರವಾಗಿಲ್ಲ . ನಾನೆಲ್ಲೂ ಓಡೋಗಲ್ಲ ! 
ಕೆಲ ಸಮಯದ ನಂತರ ಕಥೆ ಮುಂದುವರಿಯಿತು . 

ಕಿಷ್ಕಿಂಧೆಗೆ  ತಲುಪಿದಾಗ ಅಲ್ಲಿಯ ರಾಜ ಸುಗ್ರೀವ  ರಾಮ -ಲಕ್ಷ್ಮಣರನ್ನು ಪರಿಚಯಿಸಿಕೊಂಡು  ಸ್ವಾಗತ ಮಾಡಿದ. ತನ್ನಿಂದ ಆಗೋ  ಎಲ್ಲ ಸಹಾಯ ಮಾಡ್ತೀನಿ    ಅಂದ .  ಸೀತೆನಾ ಹುಡುಕೋದಕ್ಕೆ  ತನ್ನ ಸೈನಿಕರನ್ನ ಕಳಿಸ್ತೀನಿ , ಅಲ್ಲಿವರೆಗೆ ದಯವಿಟ್ಟು ಕಿಷ್ಕಿಂಧೆಲೇ  ಉಳ್ಕೊಳಿ ಅಂದ .ಅವರಿಗೆ ಇರೋ ವ್ಯವಸ್ಥೆ  ಮಾಡಿ ಕೊಟ್ಟ .

ಆಮೇಲೆ , ರಾಮ  ಸುಗ್ರೀವನಿಗೆ ಹೇಳ್ದ " ನೋಡು ನಂಗೆ ಜಟಾಯು ಅನ್ನೋ ಹಕ್ಕಿ ಹೇಳ್ತು , ಸೀತೆ ನ ರಾವಣ ಎತ್ಕೊಂಡು ಹೋಗಿದಾನೆ ಅಂತ . ಅವನು ಇರೋ ಲಂಕೆ  ಎಲ್ಲಿದೆ ಅಂತ ಗೊತ್ತ ? "

ಅದಕ್ಕೆ ಸುಗ್ರೀವ , ಹಾಂ ಗೊತ್ತು . ಆದರೆ  ಲಂಕೆ  ಇರೋದು ಸಮುದ್ರದಲ್ಲಿ . ಸೀತೆನ  ಅಲ್ಲೇ ಇಟ್ಟಿದಾನಾ ಅಂತ ನೋಡಬೇಕಲ್ಲ . ಅದಕ್ಕೆ ಲಂಕೆಗೆ  ಮೊದಲು ಹೋಗೋದ್ ಹೇಗೆ  ಅಂತ ಕೇಳಿದ .

ಇಬ್ರೂ ಆ ಬಗ್ಗೆ ಚರ್ಚೆ ಮಾಡ್ತಿರೋವಾಗ , ಸುಗ್ರೀವನ  ಜೊತೆ ಇರೋ ಹನುಮಂತ  ತಾನು ಬೇಕಾದ್ರೆ ಹೋಗಿ ನೋಡ್ಕೊಂಡು ಬರ್ತೀನಿ ಅಂದ .ಸರಿ ಹಾಗೆ ಮಾಡೋದು ಅಂತಾಯ್ತು  . ಅವನು ವಾಪಸ್ ಬಾರೋ ವರೆಗೂ  ರಾಮ -ಲಕ್ಷ್ಮಣ  ಕಿಷ್ಕಿಂಧೆಲೆ ಇರೋದು ಅಂತ ಆಯ್ತು . 

ಹನುಮಂತ  ಲಂಕೆಗೆ ಹೋಗ್ತೀನಿ ಅಂತ ಏನೋ ಹೇಳಿದ . ಆದರೆ ಹೇಗೆ ಅಂತ  ಅವನಿಗೆ ಪ್ರಶ್ನೆ ಆಗ್ತಾ ಇತ್ತು .   ಸಮುದ್ರ ತೀರದಲ್ಲಿದ್ದ ಬೆಟ್ಟದ ಮೇಲೆ ಹತ್ತಿ ಹನುಮಂತ  ಲಂಕೆ ಕಾಣಿಸತ್ತಾ ಅಂತ ನೋಡಿದ . ಉಹೂಂ .. ಅಷ್ಟು ದೂರಕ್ಕೂ  ನೀರು ಬಿಟ್ರೆ ಏನು ಕಾಣಿಸ್ತಾ ಇರಲಿಲ್ಲ . ಈಗ ಎಲ್ಲಾರಿಗೂ ಯೋಚನೆ ಶುರುವಾಯ್ತು .  ಎಷ್ಟು ನೋಡಿದರೂ ಬರೀ  ಸಮುದ್ರಾ ನೇ ಕಾಣಿಸ್ತಿದೆ  ಲಂಕೆ ಯಾವ ದಿಕ್ಕಿಗೆ ಇದೆ ಅಂತ ಕೂಡ ಗೊತ್ತಿಲ್ಲ . ಅಲ್ಲಿಗೆ ಹೋಗೋದು ಹೇಗೆ ಅಂತ ಎಲ್ಲಾರಿಗೂ ಪ್ರಶ್ನೆ ! 

 ಬೆಟ್ಟ ಹತ್ತಿದ   ಹನುಮಂತ ಸಮುದ್ರನ ನೋಡ್ತಾ ಯೋಚನೆ ಮಾಡ್ತಾ  ಇದ್ದ . ಕೊನೆಗೆ  ಒಂದು ನಿರ್ಧಾರಕ್ಕೆ ಬಂದು  ಕಿಷ್ಕಿಂಧೆ ಗೆ ವಾಪಸ್ ಬಂದ . 
ಸುಗ್ರೀವನೆದುರು  ರಾಮನಿಗೆ ಹೇಳಿದ "  ನಾನು ಲಂಕೆಗೆ  ಹೋಗಿ ಬರ್ತೀನಿ "  ಅಂದ .

 ಅವನ ವಿಶ್ವಾಸ ನೋಡಿ ರಾಮ ನಿಗೆ ತುಂಬಾ ಸಂತೋಷ ಆಯ್ತು .  ಸರಿ  ಹೋಗಬಾ , ಸೀತೆ ಹೇಗಿದಾಳೆ , ಅವಳಿಗೇನೂ ತೊಂದರೆ  ಮಾಡ್ತಿದಾನ ಆ ರಾವಣ ಅಂತ ನೋಡ್ಕೊಂಡು ಬಂದು ಹೇಳು. ನಾವು ಕಾಯ್ತಿರ್ತೀವಿ ಅಂದ ರಾಮ .

"ನಾನು ನಾಳೆ ನೇ ಅಲ್ಲಿಗೆ ಹೋಗ್ತೀನಿ ಅಂದ ಹನುಮಂತ  ಮತ್ತೊಂದು ಪ್ರಶ್ನೆ ಕೇಳಿದ . " ಆದರೆ ಅಲ್ಲಿ  ಸೀತಾ ದೇವಿನ ನಾನು ಹೇಗೋ  ಗುರುತಿಸ್ತೀನಿ . ಆದರೆ  ಅವಳಿಗೆ  ನಾನು ಯಾರು ಅಂತ ಗೊತ್ತೇ ಇಲ್ವಲ್ಲ "  ಅಂದ . 

" ಹೌದಲ್ವಾ? , ಅವಳತ್ರ ಒಂದು ಮೊಬೈಲ್ ಆದ್ರೂ ಇದಿದ್ರೆ , ರಾಮ  ಹನುಮಂತಂದು ಫೋಟೋ ಕಳ್ಸಿ  ಮೆಸೇಜ್ ಮಾಡಬಹುದಿತು !  ಈಗ ಕಷ್ಟಾ ನೇ . ಅಂದಂಗೆ ರಾಮನತ್ರ  ಅವಳ ಫೋಟೋ ಇರ್ಲಿಲ್ವಾ ಅಜ್ಜಿ ? ಹನುಮಂತಂಗೆ  ತೋರ್ಸೊಕೆ?  " 

ಆದಿತ್ಯ ಮತ್ತೆ ವರುಣ್ ಇಬ್ಬರೂ ಜೋರಾಗಿ ನಗೊಕ್ ಶುರು ಮಾಡಿದ್ರು . 
" ಹೇಯ್, ಇವಳ ಕಥೆ ಕೇಳೋ ...  ನಗುತ್ತಲೇ  ತಂಗಿಯ ಕಡೆ ತಿರುಗಿದ ಆದಿತ್ಯ 
" ಗೂಬೆ,  ಮೊಬೈಲ್  ಇದಿದ್ರೆ , ರಾಮಂಗೆ ಕಷ್ಟ ಯಾಕಾಗ್ತಿತ್ತು ಹುಡ್ಕೋಕೆ?  ಲೋಕೇಶನ್ ಟ್ರ್ಯಾಕ್ ಮಾಡ್ತಿರ್ಲಿಲ್ವೇನೆ? ಅಷ್ಟಲ್ದೆ , ದಿನಾ ವಾಟ್ಸ್ ಅಪ್ ಮಾಡ್ಕೋತಾ ಇದ್ರೂ ಇಬ್ರುನು  ಬೇಕಾದ್ರೆ . ನೀನೊಳ್ಳೆ !!  "  

" ಮುಖ ಚಿಕ್ಕದಾಗಿಸಿಕೊಂಡ ಅಪೂರ್ವ  " ನೋಡಜ್ಜಿ ಅಣ್ಣನ್ನ ... "  ನೀನೇ ಗೂಬೆ ಕಣೋ ,  ಅಲ್ಲಾ , ಸೀತೆ ಮೊಬೈಲ್ ದಾರೀಲಿ ಎಲ್ಲಾದ್ರೂ ಬಿದ್ದು ಹೋಗಿರಬಹುದು . ಸಮುದ್ರ ದಾಟೋವಾಗ ಬಿದ್ದಿರಬಹುದು , ಅಥ್ವಾ ಸಿಗ್ನಲ್ ಸಿಗ್ತಾ ಇರ್ಲಿಲ್ವೇನೋ . ಅಷ್ಟಕ್ಕೂ ಲಂಕೆ ಅಂದ್ರೆ  ಬೇರೆ ದೇಶ ಆಗಿತ್ತಲ್ವ?  ಮೊಬೈಲ್ ರೋಮಿಂಗ್ ಇರ್ಲಿಲ್ಲ  ಅನ್ಸತ್ತೆ ಅವಳದ್ದು .  ಬ್ಯಾಟರಿ ಮುಗ್ದಿರಬಹುದು . ಸಲ್ಪ ಚಾರ್ಜ್ ಮಾಡ್ಕೋಬೇಕು ಅಂತ ಕೇಳೋಕಾಗತ್ತ ?  ವೈ ಫೈ ಪಾಸ್ ವರ್ಡ್ ಕೇಳಿಲ್ಲ ಅವ್ಳು ರಾವಣ ನ ಹತ್ರ ..  ಎಷ್ಟೆಲ್ಲಾ ರೀಸನ್ ಇದೆ ಅಲ್ವೇನೋ ?  " ಪಟ ಪಟನೆ  ಅಪೂರ್ವ ಹೇಳುತ್ತಿದ್ದರೆ ಅಣ್ಣಂದಿರಿಬ್ಬರೂ  ಮುಖ ನೋಡಿಕೊಳ್ಳುತ್ತಾ  ಪೆಚ್ಚಾದರು .  ಅಜ್ಜಿ  ಕಣ್ಣರಳಿಸಿ  ನೋಡುತ್ತಿದ್ದರು . ಇಷ್ಟು ಚಿಕ್ಕ ವಯಸ್ಸಿಗೆ ಏನೆಲ್ಲಾ ಗೊತ್ತಪ್ಪ  ಇವಳಿಗೆ ಅಂತ !

ಇದನ್ನೆಲ್ಲಾ ಕೇಳುತ್ತಿದ್ದ  ಸ್ಮಿತಾ  ಉಕ್ಕುತ್ತಿದ್ದ ನಗುವನ್ನು ತಡೆದುಕೊಂಡು  " ಮೊಬೈಲ್  ಇತ್ತೋ ಇಲ್ವೋ ಅಂತ ಚರ್ಚೆ ಮಾಡ್ತಾ ಇರ್ತೀರೋ ಅಥವ ಅಜ್ಜಿ ಕಥೆ  ಕೇಳ್ತೀರೋ " ಎಂದು  ಗದರಿದಳು. 

"ಸಾರಿ ಅಜ್ಜೀ,  ಹೇಳು ಹೇಳು "  ಮೂವರೂ ಒಟ್ಟಿಗೆ ಒದರಿದರು. 

ಸರಿ ,  ಬೆಳಿಗ್ಗೆ ಹನುಮಂತ  ಲಂಕೆಗೆ ಹೊರಡೋಕೆ ರೆಡಿ ಆದ.  ಸುಗ್ರೀವ , ರಾಮ-ಲಕ್ಷ್ಮಣರಿಗೆ ನಮಸ್ಕಾರ ಮಾಡಿದ.
 ರಾಮ ಅವನನ್ನು  ಅಪ್ಪಿಕೊಂಡು " ಹನುಮಂತ , ಸುರಕ್ಷಿತವಾಗಿ ಹೋಗಿ ಬಾ. ಸೀತೆಯ  ವಿಷಯ ಕೇಳೋಕೆ ನಾವು ಕಾಯ್ತಾ ಇರ್ತೀವಿ " ಅಂದ .
ಹಾಗೇ   ಹನುಮಂತನ ಕೈಗೆ  ತನ್ನ ಉಂಗುರ ಕೊಟ್ಟು , ಇದನ್ನು  ಸೀತೆ ಗೆ ತೋರಿಸು . ಅವಳಿಗೆ ನೀನು ನನ್ನ ಕಡೆಯವನು ಅಂತ ಗೊತ್ತಾಗತ್ತೆ " ಎಂದ . 

ಆ ಉಂಗುರನ  ಭದ್ರವಾಗಿ ಇಟ್ಟುಕೊಂಡು ಹನುಮಂತ ಹೊರಟ .  ಅವನ್ನ ಕಳಿಸೋಕೆ ಅಂತ ಎಲ್ಲರೂ  ಸಮುದ್ರದ ವರೆಗೂ ಹೋದ್ರು . ಹನುಮಂತ ಸಮುದ್ರದ  ಪಕ್ಕದ ಚಿಕ್ಕ ಬೆಟ್ಟ ಹತ್ತಿ  ನಿಂತ . ಸಮುದ್ರವನ್ನು ಸಲ್ಪ ಹೊತ್ತು ನೋಡಿ,  ರಾಮನಿಗೆ ಮತ್ತೊಮ್ಮೆ ನಮಸ್ಕಾರ ಮಾಡಿದ .  ಅವನು  ಲಂಕೆಗೆ ಹೊರಟಿದ್ದನ್ನು ನೋಡಲೆಂದು  ಕಿಷ್ಕಿಂಧೆಯ   ಕಪಿಗಳೆಲ್ಲಾ  ಅಲ್ಲ್ಲಿ ಬಂದು ಸೇರಿದ್ದರು . ಅವರೆಲ್ಲಾ ಉತ್ಸಾಹದಿಂದ ಜೈಕಾರ ಹಾಕುತ್ತಿದ್ದಂತೆ  ಹನುಮಂತ ಬೆಟ್ಟದಿಂದ ಜಿಗಿದೆ ಬಿಟ್ಟ . 

"ಅಜ್ಜಿ , ಅವನು ಕೆಳಗೆ ಬಿದ್ದು ಕೈ ಕಾಲು ಮುರ್ಕೊಂಡಿಲ್ಲ ತಾನೇ? "
"ಅಜ್ಜೀ, ಅದು ಹ್ಯಾಗೆ  ಲಂಕೆ ತಲುಪ್ತಾನೆ?  ಸಮುದ್ರ  ಅಂದ್ರೆ ತುಂಬಾ ದೊಡ್ದದಲ್ವ?  ಆ ತರ ಜಂಪ್  ಮಾಡಿ ದಾಟಕಾಗತ್ತ ? " ಮಕ್ಕಳ ಪ್ರಶ್ನೆಗಳು .

"ಅವನಿಗೆ ಅಂಥಾ ಶಕ್ತಿ ಇತ್ತು ಕಣ್ರೋ  ಎಷ್ಟಿ ದೂರ ಬೇಕಾದ್ರೂ  ಹಾರೋಕಾಗ್ತಿತ್ತು  !"

"ನಿಜಾ ಅಜ್ಜಿ . ನಾನು ಟಿ ವಿ ಲಿ  " ಜೈ ಹನುಮಾನ್ " ಲ್ಲಿ ನೋಡಿದೀನಿ" . ಅಪೂರ್ವ ಹೇಳಿದಳು 
"ಅಜ್ಜೀ, ಈಗ  ಹನುಮಂತ ಇದಿದ್ದರೆ , ಒಲಿಂಪಿಕ್ಸ್ ಗೆ  ಲಾಂಗ್ ಜಂಪ್ , ಹೈ ಜಂಪ್ ಎರಡಕ್ಕೂ ಅವನ್ನೇ  ಕಳಿಸಬಹುದಿತ್ತು "  ಕಿಸಕ್ಕನೆ ನಕ್ಕರು ಗಂಡು ಹುಡುಗರಿಬ್ಬರೂ .

ಅತ್ತ ಲಕ್ಷ್ಯ ಕೊಡದೆ ಅಜ್ಜಿ ಮುಂದುವರೆಸಿದರು .

"ಸುಮಾರು ದೂರ , ಅದೆಷ್ಟೋ ಹೊತ್ತು ಹಾರಿದ ಮೇಲೆ   ಅವನಿಗೆ ಲಂಕೆ ಕಾಣಿಸಿತು . ಸ್ವಲ್ಪ ಹೊತ್ತಿನಲ್ಲಿ ಲಂಕೆಯ  ಬಾಗಿಲಿನ ಎದುರು ಹನುಮಂತ ನಿಂತಿದ್ದ . 
ಲಂಕೆಯ ಸುತ್ತಲೂ ಭದ್ರವಾದ ಕೋಟೆ ಇತ್ತು. ಅದರ  ಬಾಗಿಲಲ್ಲಿ  " ಲಂಕಿಣಿ "   ಕಾವಲಿಗೆ ನಿಂತಿದ್ದಳು . ಎದುರು ಬಂದು ನಿಂತ ಹನುಮಂತನನ್ನು ಒಳಗೆ ಹೋಗದಂತೆ  ತಡೆದಳು . ಆಮೇಲೆ ಅವರಿಬ್ಬರ ನಡುವೆ  ಒಂದು ಚಿಕ್ಕ ಯುದ್ಧ ನೇ ಆಗೋಯ್ತು .  ಅವಳನ್ನು ಸೋಲಿಸಿದ ಹನುಮಂತ  ಕೋಟೆಯ ಒಳ ಹೊಕ್ಕ ."

ಹೆಚ್ಚು ಬ್ರೇಕ್ ಕೊಡದೆ ಅಜ್ಜಿ  ಕಥೆ ಹೇಳುತ್ತಿದ್ದರು . 
"ಅಜ್ಜೀ, ಬಾಗಿಲು ಕಾಯೋಕೆ ಲಂಕಿಣಿನ  ಯಾಕೆ ಇಟ್ಟಿದ್ರು ? ಅವಳ ಜೊತೆ ಬೇರೆ ಯಾರೂ ಇರಲಿಲ್ವ? ಹನುಮಂತ ಹಾಗೆ  ಹೆಂಗಸಿನ ಜೊತೆ ಯುದ್ಧ ಮಾಡಬಹುದಿತ್ತಾ? "

"ಲಂಕಿಣಿ ಸಾಮಾನ್ಯದವಳಾಗಿರ್ಲಿಲ್ಲ  ಕಣ್ರೋ , ತುಂಬಾ ಶಕ್ತಿ ಇತ್ತು ಅವಳಿಗೆ . ಅವಳನ್ನ ಸೋಲಿಸೋಕೆ  ಹನುಮಂತಂಗೆ  ಸುಮಾರು ಕಷ್ಟ ಆಯ್ತು . ಹೇಗೋ ಮಾಡಿ ಅವನು ಒಳಗೆ ಹೋದ . "


ಹಿಂದಿನ ಕಂತುಗಳು 






November 18, 2017

ಹೇಳು ....



ಇರುಳ ನೆರಳಲಿ  ಎನ್ನ 
ಮರುಳು ಮಾಡುವುದೇಕೆ 
ಮುಂಗುರುಳ ಸರಿಸುತಲಿ
ಮುದ್ದುಗರೆಯುವೆಯೇಕೆ 

ನನ್ನೊಲವೆ ನೀನೆಂದು 
ಮೋಹಗೊಳಿಸುವುದೇಕೆ 
ಅಧರಗಳ ಮಧುವನ್ನು 
ಸವಿದು ನಗುತಿಹೆಯೇಕೆ 

ಹೃದಯದಲಿ ನೂರಾರು 
ಬಯಕೆ ತುಂಬುವುದೇಕೆ 
ಮತ್ತೀಗ ಮೌನದಲಿ  
ಮನವ ಕಲಕುವುದೇಕೆ

ಹಾಗೇಕೆ ಹೀಗೇಕೆ
ಹೇಳು ಇನಿಯಾ 
ಬರುವುದೋ ಬಿಡುವುದೋ 
ನಿನ್ನ ಸನಿಯ 

October 9, 2017

ಬಯಕೆ

ರವಿಯ ಹೊಂಗಿರಣವು  ಕಣ್ಣ ಸೋಕುವ ತನಕ 
ಮುದ್ದು ಮುಖದಲಿ  ಕೆಂಪು ಎದ್ದು ಕಾಣುವ ತನಕ 
ಎದೆ ಬಡಿತ  ಹೆಚ್ಚಾಗಿ  ಕಿವಿಗೆ ಕೇಳುವ ತನಕ 
ಬಂಧಿಸುವ  ಬಯಕೆಯಿದೆ  ನನ್ನ ಚೆಲುವೆ 

ಹಚ್ಚಿದಾ ತುಟಿ ಬಣ್ಣ ಒರೆಸಿ ಹೋಗುವ ತನಕ 
ಕಣ್ಣಿನಾ ಕಾಡಿಗೆಯು ತೀಡಿ ಹೋಗುವ ತನಕ 
ಕಟ್ಟಿದಾ ಹೆರಳದು  ಬಿಚ್ಚಿ ಹರಡುವ ತನಕ 
ಮುದ್ದಿಸುವ ಬಯಕೆಯಿದೆ ನನ್ನ  ಚೆಲುವೆ 

ನಾಚಿಕೆಯ ತೆಳು ಪರದೆ  ಕಳಚಿ ಬೀಳುವ ತನಕ 
ಬಯಕೆಗಳ  ಪೂರದಲಿ  ಕೊಚ್ಚಿ ಹೋಗುವ ತನಕ 
ಮೈಮನಗಳೊಂದಾಗಿ  ಕರಗಿ ಹೋಗುವ ತನಕ 
ಪ್ರೀತಿಸುವ ಬಯಕೆಯಿದೆ ನನ್ನ ಚೆಲುವೆ 

July 22, 2017

ಕಾಯುತಿಹೆ .....



ನಿನ್ನ ಕನಸುಗಳಲ್ಲಿ ನಾನಿಹೆನೋ ಇಲ್ಲವೋ 
ನನ್ನ ಕನವರಿಕೆಯಲಿ ನೀನಿರುವೆ ಗೆಳೆಯ 
ಬೆಳಗಿನಲಿ  ಸಂಜೆಯಲಿ , ಏಕಾಂತದಿರುಳಿನಲಿ 
ನನ್ನ ಮನ ಬಯಸಿಹುದು  ನಿನ್ನ ಸನಿಯ 

ತನುವ ಕಚಗುಳಿಯಿಡುತ ಕೇಳುತಿದೆ ತಂಗಾಳಿ 
ಎಂದು ಬರುವನು  ಹೇಳು ನಿನ್ನ  ಇನಿಯ ?
ಬಳಸುವನೆ ತೋಳಿನಲಿ  ಕೆಣಕುವನೆ ಮಾತಿನಲಿ ?
ಪಿಸುಮಾತು  ತುಂಬುವುದೇ  ನಿನ್ನ  ಕಿವಿಯ ?

ಮುಡಿದ ಮಲ್ಲಿಗೆ ಮಾಲೆ  ಜಡೆಯಲ್ಲೇ ಬಾಡುವುದೇ?
ಪರಿಮಳವು  ಪಸರುವುದೇ ಕೋಣೆಯಲ್ಲಿ?
ಬಳೆಯ ಕಿಂಕಿಣಿ  ನಾದ ಕೇಳುವುದೇ ನೀ  ಹೇಳು 
ಕುಂಕುಮವು  ಕರಗುವುದೇ  ಬೆವರಿನಲ್ಲಿ ? 

ಸಂಜೆ ಇಳಿದಿದೆ ನಲ್ಲ ,  ಒಳಗೆ ಬೆಳಗಿದೆ ದೀಪ  
ಸಜ್ಜೆಮನೆಯೊಳಗಿಹುದು  ಧೂಪದಾರತಿಯು   
ಕಾತರದಿ ಕಾಯುತಿಹೆ ಮನೆಯ ಮುಂಬಾಗಿಲಲಿ  
ಬಂದು ಬೇಗನೆ  ಮನಕೆ ಮುದವ ನೀಡು

June 28, 2017

ಮಲೆನಾಡ ಮಳೆಗಾಲ



ಧೋ ಎಂದು ಸುರಿವ ಮಳೆ
ರಸ್ತೆ ತುಂಬಿದ ನೀರು 
ತೇಲಿ ಬಿಟ್ಟಿಹ ದೋಣಿ 
ಕುಣಿದು ಸಾಗುವುದು 

ಬಚ್ಚಲಿನ ಒಲೆಯಲ್ಲಿ 
ಗೇರು ಬೀಜದ  ಘಮಲು 
ಅಡುಗೆ ಮನೆಯೊಳಗೆ
ಬಿಸಿ ಹಪ್ಪಳದ ಪರಿಮಳ 

ಅಂಗಳಕೆ ಕಾಲಿಡಲು 
ಇಂಬಳದ ಭಯವಿಹುದು  
ಕಂಬಳಿಯ ತೆಕ್ಕೆಯಲಿ 
ಮಲಗುವುದೇ ಬಲು  ಸುಖ 

ಕಿಟಕಿ ಬದಿಯಲಿ ಖುರ್ಚಿ 
ಕೈಯಲ್ಲಿ ಬಿಸಿ ಕಾಫಿ 
ಹೊರಗೆ ಸುರಿಯುವ ಮಳೆಯ 
ಜೋಗುಳದ ಹಾಡು 

ಮಲೆನಾಡ ಮಳೆಗಾಲ 
ಮನಸಲ್ಲಿ ಹಸುರಾಗಿ 
ಎಂದೆಂದೂ ಮರೆಯದಿಹ 
ಮಧುರ ನೆನಪು 

June 18, 2017

ಚಂದ್ರ ನಾಚಿದ ಸಮಯ !



ನೇಸರನು ಭೂಮಿಯನು
ಚುಂಬಿಸುವ ಸಮಯದಲಿ
ಕಣ್ಣ ಮಿಟುಕಿಸಿತೊಂದು ತುಂಟ ತಾರೆ
ಸಾಗರನು ಕೆಂಪಾಗೆ
ನಾಚಿ ನಿಂತನು ಚಂದ್ರ
ಪ್ರಿಯನ ತೋಳಲಿ ಅಡಗಿದಳು ನೀರೆ
ಕನಸು ತುಂಬಿದ ಕಣ್ಣು
ತುಸುವೇ ಬಿರಿದಿಹ ಅಧರ
ಬಿಸಿಯಾಗಿ ಕೆಂಪಾದ ಅವಳ ಕೆನ್ನೆ
ಬಳ್ಳಿ ನಡುವಿನ ತನುವು
ನವಿರಾಗಿ ನಡುಗಿರಲು
ಬಿಗಿಯಾಗಿ ಬಳಸಿದಳು ಇನಿಯನನ್ನೇ 

June 13, 2017

ವಾಟ್ಸ್ ಅಪ್ !

ಇ-ಮೇಲ್ ಟೈಪ್ ಮಾಡುತ್ತಿದ್ದವಳ ಪಕ್ಕದಲ್ಲಿದ್ದ  ಮೊಬೈಲ್ ಮಿಂಚಿತು . ಸ್ಕ್ರೀನಲ್ಲಿ ವಾಟ್ಸ್ ಅಪ್ ನ  ನೋಟಿಫಿಕೇಶನ್ ಕಂಡಾಗ  ಅವಳ ತುಟಿಯ ಮೇಲೆ ಸಣ್ಣ ನಗು ಮೂಡಿತು . ಅದು ಯಾರದ್ದೆಂದು  ನೋಡುವ ಅಗತ್ಯವಿರಲಿಲ್ಲ ! 
ಮೊದಲು  ಇ-ಮೇಲ್ ಕಳಿಸಿ , ಮತ್ತೆ ಮೆಸೇಜ್ ನೋಡಿದರಾಯ್ತೆಂದು  ಬರೆಯುವುದನ್ನು ಮುಂದುವರಿಸಿದಳು . 
ಮುಂದಿನ ೩ ನಿಮಿಷಗಳಲ್ಲಿ ಅವಳು  ಮೇಲ್ ಕಳಿಸಿ  ಮೊಬೈಲ್ ಕೈಗೆತ್ತಿಕೊಳ್ಳುವಷ್ಟರಲ್ಲಿ ೪-೫ ಮೆಸೇಜ್ ಗಳು ಕಾಯುತ್ತಿದ್ದವು .  ಎಲ್ಲವೂ ಅವನದ್ದೇ . 

" ಹಲೋ ಮೇಡಂ  ... 
..ಸ್ಮೈಲಿ 
 ಏನ್ ಮಾಡ್ತಾ ಇದೀರಾ? 
ತುಂಬಾ ಬ್ಯುಸಿ ನಾ? 
 ಟೈಂ ಇಲ್ಲ ಅನ್ಸತ್ತೆ  
ಹಲೋ ....."

ಮುಗುಳುನಗು ಸಲ್ಪ ದೊಡ್ಡದಾಯಿತು . 
"ಹಲೋ  
ಹೇಳಿ . ಇ ಮೇಲ್ ಮಾಡ್ತಾ ಇದ್ದೆ . ನೋಡಿಲ್ಲ .ಸಾರಿ "

ಅವನ ರಿಪ್ಲೈ ಬಂತು ತಕ್ಷಣವೇ 

" ನೋಡಿರ್ತೀರಾ ಗ್ಯಾರಂಟಿ . ರಿಪ್ಲೈ ಮಾಡಿಲ್ಲ ಅಷ್ಟೇ . 

ನಂಗೆ ಮೇಲ್ ಮಾಡ್ತಿದ್ರ? ನಾನು ನಿಮಗೆ ನನ್ ಇ ಮೇಲ್ ಐ ಡಿ ಕೊಟ್ಟೆ ಇಲ್ಲ ? "


"ಹಾಂ , ಪ್ರಪಂಚದಲ್ಲಿ ನೀವೊಬ್ರೆ ಇರೋದು  ನಂಗೆ ಇ ಮೇಲ್ ಮಾಡೋಕೆ  ."
"ಹಹಹ  , ನಾನೊಬ್ನೆ ಇದ್ರೆ , ಇ ಮೇಲ್ ಯಾಕ್ರೀ ಮಾಡ್ತಿರ  ನಿಮ್ಮೆದುರಿಗೆ  ಕೂತಿರ್ತೀನಿ  ಬೇಕಾದ್ರೆ .."

"ಹಾಂ ನಿಮಗೆ ಕೆಲಸ ಇಲ್ಲ ಅಂದ್ರೆ ನಂಗೆ ಇದೇರಿ . ನಮ್ ಮ್ಯಾನೇಜರ್ ಆಗಿಂದ ಕರಿತಾ ಇದಾರೆ .
ಹೋಗ್ಬೇಕೀಗ.  ಮತ್ತೆ ಸಿಗ್ತೀನಿ ."

"  :(  ಹೋಗ್ಬೇಡ್ರೀ  .. ಪ್ಲೀಸ್  ..... "



ಮುಂದುವರಿಯಿತು  ಹೀಗೆ  
ಸೌಮ್ಯಾ  ಯೋಚಿಸುತ್ತಿದ್ದಳು .  ಎಷ್ಟು ದಿನವೂ ಆಗಿಲ್ಲ  ಪರಿಚಯವಾಗಿ , ಯಾಕೆ ಇಷ್ಟು ಹಚ್ಚಿಕೊಂಡೆ ಇವನನು ?  ಜಾಲಿ ಆಗಿ  ಮಾತಾಡ್ತಾನೆ ಅಂತಲ? ಅಥವಾ  ಬುದ್ಧಿವಂತ ಅಂತಲ?  ಎಳೆ ವಯಸ್ಸು  ಕೆಲವೊಮ್ಮೆ ಹುಡುಗು  ಬುದ್ಧಿ ಅನಿಸಿದರೂ  ಹೇಗೋ ಒಂಥರಾ ಇಷ್ಟವಾಗಿ ಬಿಟ್ಟಿದ್ದ ಅವನು .   ಸಾಧಾರಣವಾಗಿ ಯಾರದೇ  ಫ್ರೆಂಡ್ ರಿಕ್ವೆಸ್ಟ್ ಇದ್ದರೂ ಸುಲಭವಾಗಿ  ಅಕ್ಸೆಪ್ಟ್ ಮಾಡದ ಅವಳು  ಇವನ ರಿಕ್ವೆಸ್ಟ್ ಅನ್ನೂ ತುಂಬಾ ದಿನಗಳ ಕಾಲ ಹಾಗೆಯೇ ಇಟ್ಟಿದ್ದಳು . ಆದರೂ ಅವನ ಮೆಸೇಜ್  ಕುತೂಹಲ ತಂದಿತ್ತು ಅವಳಿಗೆ. 

" ಮೇಡಂ , ನಿಮಗೆ ರಿಕ್ವೆಸ್ಟ್ ಕಳಿಸೋರು ನಿಮ್ಮ ಅಭಿಮಾನಿ ಅಂತ ಹೇಳೋರೂ ತುಂಬಾ ಜನ ಇರಬಹುದು .ಅದರಲ್ಲಿ ನಾನೂ ಒಬ್ಬ ಅಂತ  ಸೈಡಿಗೆ ಇಟ್ಟಿರ್ತೀರ . ನಾನು ನಿಮ್ಮ ದೊಡ್ಡ ಅಭಿಮಾನಿ ಅಂತ ಎಲ್ಲ ಹೇಳ್ಕೊಳೋಲ್ಲ . ನಿಮಗಿಂತ  ಜಾಸ್ತಿ ನಾನು ಇಷ್ಟ ಪಡೋ ಬರಹಗಾರರು ಇದಾರೆ. ಆದರೆ ನಿಮ್ಮ ಬರವಣಿಗೆಯ  ಶೈಲಿ ಇಷ್ಟ ಆಗತ್ತೆ . ಸರಳ ಸುಲಭ  ಅನಿಸತ್ತೆ .  ನನಗೂ ಸಾಹಿತ್ಯದಲ್ಲಿ ಅಲ್ಪ ಸ್ವಲ್ಪ ಆಸಕ್ತಿ ಇದೆ .ನಾನೂ ಯಾವಾಗ್ಲಾದ್ರೂ ಒಂದೋ ಎರಡೋ ಕತೆ ಬರ್ದಿದೀನಿ . ( ಅದು ನನಗೇ ಇಷ್ಟ ಆಗಿಲ್ಲ ಬಿಡಿ ) . ನಿಮ್ಮಿಂದ ಯಾವಾಗ್ಲಾದ್ರೂ ಸಲಹೆಗಳನ್ನ ತೊಗೋಳೋಣ ಅಂತ ಅನಿಸತ್ತೆ . ಹೀಗಾಗಿ  ರಿಕ್ವೆಸ್ಟ್ ಕಳ್ಸಿರೋದು . ದಯವಿಟ್ಟು  ಅಕ್ಸೆಪ್ಟ್ ಮಾಡಿ . ಆದರೆ ಒತ್ತಾಯ ಏನಿಲ್ಲ . ನಿಮ್ಮ ಅಕೌಂಟ್ , ನಿಮ್ಮಿಷ್ಟ !  "
ಇಂಟರೆಸ್ಟಿಂಗ್  ಅನಿಸಿ , ಅವನ ಪ್ರೊಫೈಲ್ ಗೆ ಹೋಗಿ ನೋಡಿದಳು . ಸಭ್ಯ  ಎನಿಸಿತು . ತನ್ನ ಪರಿಚಯದ ಇನ್ನೂ ಕೆಲವರು ಅವನ   ಲಿಸ್ಟಲ್ಲಿ  ಇರುವುದು ಕಾಣಿಸಿತು . ಆಮೇಲೆ ಫ್ರೆಂಡ್ಸ್ ಲಿಸ್ಟ್ ಗೆ  ಸೇರಿಕೊಂಡ ಅವನು . 

 ಅಪ್ರೂವ್ ಮಾಡಿದ ಕೆಲ ನಿಮಿಷಗಳಲ್ಲೇ  ಮೆಸೇಜ್ ಬಂದಿತು ಅವನದು .  
"ಅಂತೂ ಇಂತೂ  ಸೇರ್ಸಿದ್ರಿ . ಥ್ಯಾಂಕ್ಸ್ ಮೇಡಂ !  ಇವತ್ತು ನಾನು ಇಲ್ಲಿರೋದಕ್ಕೂ ಸಾರ್ಥಕ ಆಯ್ತು ! "

 ಸುಮ್ಮನೆ ಒಂದು ಸ್ಮೈಲೀ ಕಳಿಸಿ   ಮುಗಿಸಿಬಿಟ್ಟಳು 

ಕೆಲ ದಿನಗಳ ನಂತರ  ಪತ್ರಿಕೆಯೊಂದರಲ್ಲಿ ಅವಳ ಕಥೆ ಪ್ರಕಟವಾದ ಮರುದಿನ  ಅವನು ಕಳಿಸಿದ್ದ ಮೆಸೇಜ್ 

 "ತುಂಬಾ ಇಷ್ಟವಾಯ್ತು ರಿ ಕಥೆ . ಆದರೂ ಯಾಕೋ  ಸಡನ್ ಆಗಿ ಮುಗಿಸಿಬಿಟ್ಟಿರೋ ಹಾಗೆ ಅನಿಸತ್ತೆ . "

"ಹ್ಮಂ .. ಥ್ಯಾಂಕ್ಸ್ .  ಅದೇನೋ , ಹೇಗೆ ಮುಂದುವರೆಸೋದೋ  ಹೊಳಿತಾ ಇರ್ಲಿಲ್ಲ . ಅದಕ್ಕೆ  ಮುಗಿಸಿಬಿಟ್ಟೆ  ! "
ಸಾಹಿತ್ಯಿಕವಾಗಿ ಸುಮಾರಷ್ಟು  ಚರ್ಚೆ ನಡೆದಾಗ .. ಅವಳಿಗೆ , ಅವನ ಬಗ್ಗೆ ಇನ್ನಷ್ಟು ಕುತೂಹಲ ಬೆಳೀತಾ ಇತ್ತು . 

ಪ್ರತಿ ದಿನ , ತಾನು ಲಾಗ್ ಇನ್ ಆಗುವುದೇ ಕಾಯುತ್ತಿದ್ದಂತೆ ಅವನ ಮೆಸೇಜ್ ಗಳು  ಬರುತ್ತಿದ್ದವು . 
ಮಾತನಾಡುವ ವಿಷಯಗಳು , ಅಭಿರುಚಿಗಳನ್ನು ಹಂಚಿಕೊಳ್ಳುವುದು  ಹೆಚ್ಚಾಯಿತು . ನಡುವೆ ಫೋನ್ ನಂಬರ್ ಕೂಡ ವಿನಿಮಯವಾದ ಮೇಲೆ , ವಾಟ್ಸ್ ಅಪ್  ಸಂಭಾಷಣೆ ಹೆಚ್ಚಾಯಿತು . 
ಕೆಲವೊಮ್ಮೆ ಅವಳಿಗೆ ಆಶ್ಚರ್ಯ ಆಗೋ ಅಷ್ಟು !  ತಾನು ಇಷ್ಟು ಸಲಿಗೆ ಯಿಂದ  ಯಾರತ್ರ  ಮಾತಡ್ತೀನಾ ಅಂತ .
ಸ್ನೇಹ ಸಲಿಗೆ  ಹೆಚ್ಚಿದಂತೆ , ಮಾತಿನಲ್ಲೂ ತುಂಟಾಟ ಇಣುಕ ತೊಡಗಿತ್ತು . ಕೆಲವೊಮ್ಮೆ  ಸುಮ್ಮನೆ ನಕ್ಕು  ಮರೆತು ಬಿಟ್ಟರೂ .. ಇನ್ನೂ ಕೆಲವು ಸಲ  ಆ ಬಗ್ಗೆ ಯೋಚನೆ ಆಗುತ್ತಿತ್ತು . ಸರಿ -ತಪ್ಪುಗಳ  ಗೊಂದಲ . 

ತನ್ನ ಜೀವನದಲ್ಲಿ ಏನೇನೋ ಆಗಿ ಹೋಗಿರುವಾಗ  ಅದರ ಜೊತೆ ಇದನ್ನೂ ಸೇರಿಸಿಕೊಳ್ಳುವ ಹಂಬಲವಂತೂ ಇರಲಿಲ್ಲ ! ಆದರೂ ದಿನ ಕಳೆದಂತೆ  ,ಹರಟೆ ಹೆಚ್ಚಿದಂತೆ  ಒಳಗೊಳಗೇ ಕಾಡುವ ಭಯ ! 

ಕ್ರಮೇಣ  ಮೆಸೇಜ್  ಲೇಟ್ ಆದರೆ  ಅದೇನೋ ಕಸಿವಿಸಿ  ಇಬ್ಬರಿಗೂ .  ಮಾಡುವ ಕೆಲಸದಲ್ಲಿ  ಲಕ್ಸ್ಯ ಕೊಡಲಾಗದ ಪರಿಸ್ಥಿತಿ. ಕ್ಷಣಕ್ಕೊಮ್ಮೆ ಮೊಬೈಲ್ / ಫೇಸ್ಬುಕ್  ಚೆಕ್ ಮಾಡುವ  , ತವಕ . ಏನಾದರೂ ಆಗಬಾರದ್ದು ಆಗಿ ಹೋಯ್ತಾ ಎಂಬ ಕಳವಳ .  ಇದೆನಾಗ್ತಾ ಇದೆ ಎಂದು ಅವಳ ಮನಸಲ್ಲಿ ಎಷ್ಟೋ ಸಲ ಎಚ್ಚರಿಕೆಯ ಗಂಟೆ ಹೊಡೆದುಕೊಳ್ಳತೊಡಗಿತು.  ಅವನು ಒಂದ್ಸಲ  ಹೇಳಿದ್ದ ... " ಅಯ್ಯೋ ಈ ರಿಲೇಶನ್ ಶಿಪ್ ಅದು ಇದು ಅಂತ  ಎಲ್ಲ ಟೈಂ ವೇಸ್ಟ್  ಮಾಡೋದ್ರಲ್ಲಿ ನಂಬಿಕೆ ಇಲ್ಲ ನಂಗೆ . ಲೈಫ್ ನ ತಲೆ ಬಿಸಿ ಇಲ್ದೆ ಹಾಯಾಗಿ ಎಂಜಾಯ್ ಮಾಡಬೇಕು ರೀ .  ಆಮೇಲೆ ಮದ್ವೆ - ಸಂಸಾರ  ಅಂತ ಇದ್ದೆ ಇದೆ . ಅಲ್ಲಿವರೆಗೂ  ಯಾವ ತಲೆ ಬಿಸಿ ಬೇಡಪ್ಪಾ " 

ನಿಮ್ ಜನರೇಷನ್   ಹೀಗೇ ಅನ್ಸತ್ತೆ !  ಅಂತ ನಕ್ಕಿದ್ದಳು 
 "ಹಂಗಂದ್ರೆ  ? ನೀವೇನು ಕೃಷ್ಣ ದೇವರಾಯನ ಕಾಲದವರಾ ? ಹೌದೂ ,  ಹತ್ರ ಹತ್ರ  ವರ್ಷ ಆಯ್ತು . ಹರಟೆ ಮೇಲೆ  ಹರಟೆ  ಆಯ್ತು .  ಆದ್ರೆ ಇನ್ನೂ  ಮುಖತಃ ಭೇಟಿ ಮಾಡಿಲ್ಲ . ಫೋಟೋದಲ್ಲಿ  ಚೆನ್ನಾಗಿ ಕಾಣಿಸಿತೀರಾ  ಆದ್ರೆ ನಿಜವಾಗೂ  ಹೇಗೆ  ಕಾಣಿಸ್ತೀರಾ ಅಂತ ಗೊತ್ತಿಲ್ಲ  . ನೋಡಬೇಕು ಅನ್ನೋ ಕುತೂಹಲ ಇದೆ . ಅಲ್ಲಾ ,ನಿಮಗೆ ಅನ್ಸಿಲ್ವೇನ್ರಿ?
ಇದ್ಯಾವ್ದೋ ತಲೆ ಹರಟೆ ಜೊತೆ ಇಷ್ಟ್ ದಿನದಿಂದ  ಮಾತಾಡ್ತಾ ಇದ್ದೀನಿ . ಒಂದ್ಸಲ  ಪ್ರಾಣಿ ಹೇಗಿದೆ ಅಂತ ನೋಡ್ಬೇಕು ಅಂತ?  ನಂಗೆ  ಫೋಟೋ ಎಲ್ಲ ಕೇಳೋದು ಕೊಡೋದ್ ಇಷ್ಟ ಇಲ್ಲ . ಮೊದಲು ಏನಿದ್ರೂ ಮುಖತಃ ಭೇಟಿ . ಉಳಿದಿದ್ದು  ಆಮೇಲೆ  ನೋಡ್ಕೊಳೋಣ  !

ಒಮ್ಮೆಲೇ ಅವಳು ಮೌನವಾದಳು .  ಆಗಲೇ  ರಿಯಲೈಸ್ ಆಯಿತು  ಅವನು  ವಾಟ್ಸಪ್ಪ್ ಅಥವಾ ಫೇಸ್ ಬುಕ್ ನಲ್ಲಿ ಒಂದೂ  ಫೋಟೋ ಹಾಕಿರಲಿಲ್ಲ  ಎಂದು !  ನೋಡೋಕ್ ಹೇಗಿರಬಹುದು  ,  ಯಾಕೆ  ಒಂದೂ ಫೋಟೋ  ಹಾಕಿಲ್ಲ ಎಂದು ಅನಿಸಿತ್ತೇನೋ ನಿಜ . ಆದರೆ ....  ಕೇಳೋಕೆ  ಸಂಕೋಚ ಆಗ್ತಿತ್ತು  ಅಂತ ಹೇಳೋದು ಹೇಗೆ ? 

ಕೆಲ ದಿನಗಳ ಮೇಲೆ   ಅವನ ಫೋನ್  ಬಂತು  " ನೆನಪಿದ್ಯೇನ್ರಿ?  ಆವತ್ತು  ಹೇಳಿದ್ದೆ, ಮುಖತಃ  ಭೇಟಿ ಮಾಡಬೇಕು ಒಂದ್ಸಲ ಅಂತ ?   ಒಂದ್ಸಲ  ಮೀಟ್ ಮಾಡೇ ಬಿಡೋಣ !  ನಾಲ್ಕು ದಿನ  ಕೆಲ್ಸದ್ ಮೇಲೆ  ದಿಲ್ಲಿಗೆ ಹೋಗ್ತಾ ಇದ್ದೀನಿ . ಮುಂದಿನ  ಶನಿವಾರ ಫ್ರೀ ಮಾಡ್ಕೊಳಿ.  ಸ್ಟಾರ್ ಬಕ್ಸ್ ಕಾಫಿ  ಓಕೆ ನಾ  ಅಥವಾ ಐಸ್ ಕ್ರೀಮಾ  ಅಂತ  ಡಿಸೈಡ್ ಮಾಡಿ ಹೇಳಿ. 
ಸಿಟಿ ಸೆಂಟರ್  ಮಾಲ್ ನಲ್ಲಿ  ಎರಡೂ ಸಿಗತ್ತೆ . ಸಂಜೆ  ಆರೂವರೆಗೆ  ಅಲ್ಲಿರೋ ಬುಕ್ ಕೆಫೆ  ಹತ್ರ ಕಾಯ್ತಾ ಇರ್ತೀನಿ . ನೀಲಿ ಟಿ ಶರ್ಟ್  ಹಾಕಿರ್ತೀನಿ . ನಿಮಗೆ ಗುರುತು ಹಿಡಿಯೋಕೆ ಸುಲಭ ಆಗ್ಲಿ ಅಂತ  ಹೇಳಿದೆ ಅಷ್ಟೇ .  ಸರಿ ಈಗ  ಹೊರಡಬೇಕು . ಸಿಗಲಾ  ? ಅಂದ ಹಾಗೆ , ಆ  ನೀಲಿ  ಸೀರೆ ಉಟ್ಟು ಬರ್ತೀರಾ ಪ್ಲೀಸ್ ? ನಿಮಗೆ  ತುಂಬಾ ಒಪ್ಪತ್ತೇ ಅದು ! ಬೈ !  "  

ಅವಳು ಮೊಬೈಲ್ ಕೈಲಿ ಹಿಡಿದು  ಗೊಂಬೆಯಂತೆ ಕುಳಿತಿದ್ದಳು . 
ಏನು ಮಾಡಬೇಕೋ ಗೊತ್ತೇ ಆಗ್ತಿರಲಿಲ್ಲ ! 
ಮಳೆ ಸುರಿದಂತೆ , ಎಲ್ಲ ಅವನೇ ಪಟ ಪಟ  ಹೇಳಿ ಮುಗಿಸಿದ್ದ  ಅವಳಿಗೆ ಹೇಳಲು ಏನೂ  ಇರದಂತೆ . 

ಹೋಗಬೇಕೋ ಬೇಡವೋ ಅನ್ನೋದನ್ನ ಅವಳೇ ಡಿಸೈಡ್ ಮಾಡಬೇಕಿತ್ತು. ಶನಿವಾರದ ವರೆಗೂ ಟೈಮ್ ಏನೋ ಇತ್ತು ..ಆದರೂ  ಅವನು ಹೇಗೆ ಕಾಣಿಸ ಬಹುದು ಅಂತ ಕುತೂಹಲ ಇರಲಿಲ್ಲವೇ? ಇಷ್ಟೆಲ್ಲಾ  ಪಟಾಕಿಯಂತೆ ವಟಗುಟ್ಟುವ ಹುಡುಗ ಎದುರಿಗೂ ಹೀಗೆ ಇರುತ್ತಾನಾ ಅಂತ ಅನುಮಾನ ಕಾಡಿರಲಿಲ್ಲವ? ಹರಟೆ ಎಲ್ಲೆಲ್ಲೋ ಹೋಗಿ ಮುಟ್ಟುವಾಗ , ನಿಜಕ್ಕೂ ಈ ಕ್ಷಣ ಇವನನ್ನೊಮ್ಮೆ ನೋಡಲೇ ಬೇಕು  ಅಂತ  ಅನಿಸಿರಲಿಲ್ಲವಾ? 
ಎಲ್ಲವೂ ಇತ್ತು  ..ಆದರೆ ಜೊತೆಗೆ ಒಂಥರಾ ಭಯ ಕೂಡ ಇತ್ತು .  ಅವನ  ತನ್ನನ್ನು ಹೇಗೆ ಕಲ್ಪಿಸಿಕೊಂಡಿದ್ದಾನೋ ?  ಅವನ ಮನಸಲ್ಲಿ ತನ್ನ ಬಗ್ಗೆ ಏನು  ಭಾವನೆಗಳಿವೆಯೋ ?  ಭೇಟಿ ಆದಮೇಲೆ  ನಿರಾಸೆ ಆಗಬಹುದೇ ಅವನಿಗೆ??  ಆ ನಂತರವೂ ಈ ಸ್ನೇಹ ಹೀಗೆ ಇರದೇ ಹೋದರೆ?
ಅದೇಕೋ ಈ ಯೋಚನೆ ಅವಳಿಗೆ  ಇಷ್ಟವಾಗುತ್ತಲೇ ಇರಲಿಲ್ಲ . ಅದ್ಯಾವ ಮಾಯದಲ್ಲೋ ಅವನು ಅವಳ  ಅತೀ ಹತ್ತಿರದವರ ಲಿಸ್ಟ್ ಸೇರಿಕೊಂಡು ಬಿಟ್ಟಿದ್ದ . ಅವನು ದೂರವಾಗುವುದು  ಅವಳು ಎಂದೂ ಬಯಸದ ವಿಷಯ . 
 ಒಟ್ಟಿನಲ್ಲಿ ತಲೆ ಕಲಸು ಮೇಲೋಗರವಾಗಿ  ಬೇರೇನೂ ತೋಚದಂತಾಗುತ್ತಿತ್ತು. 


ಈ ವಿಷಯದಲ್ಲಿ  ಯಾರನ್ನು ಸಲಹೆ ಕೇಳುವುದೂ ಸಾಧ್ಯವಿರಲಿಲ್ಲ .  'ಅವನು'  ತಾನು  ಯಾರಲ್ಲೂ ಹಂಚಿಕೊಳ್ಳದಂಥಾ  ಗುಟ್ಟಾಗಿದ್ದ .   ಏನಂದು ಕೊಳ್ಳುತ್ತಾರೆ ಯಾರಾದ್ರೂ ?  ಇವಳಿಗೇನು ಬಂತಪ್ಪಾ  ಅನ್ನೋಲ್ವೇ?
ಆದರೆ , ನೀರಸವಾಗಿ , ಅರ್ಥವಿಲ್ಲದೆ  ಸಾಗುತ್ತಿರುವ ತನ್ನ ಜೀವನದಲ್ಲಿ ಸ್ವಲ್ಪ ಆದ್ರೂ  ನಗು  ತುಂಬಿದವನು ಇವನು ಅಂತ  ಯಾರಿಗೂ ಗೊತ್ತಿಲ್ಲ .ಅದನ್ನ ತಾನು ಹೇಳಿದರೆ  ಏನೆಲ್ಲಾ ಮಾತುಗಳು ಬರಬಹುದು ಎಂದು ಯೋಚಿಸಿಯೇ  ಬೆವರಿದ್ದಳು . 

ಅವನ ಮಾತುಗಳಲ್ಲಿ ಕೆಲವು ಸಲ ತನ್ನ ಕೆನ್ನೆ ಕೆಂಪೇರಿಸುವ ತುಂಟತನ  ಇಣುಕುವುದನ್ನು  ಇತ್ತೀಚೆ ಗಮನಿಸಿದ್ದಳು . 
ಒಮ್ಮೊಮ್ಮೆ ಕಸಿವಿಸಿ ಆದರೂ  ಹಾಗೆಲ್ಲಾ ಹೇಳ ಬೇಡವೆನ್ನುವ , ಬೈಯುವ ಮನಸಾಗುತ್ತಿರಲಿಲ್ಲ ಎನ್ನುವುದು  ಅರಿವಿಗೆ ಬಂದಾಗ   ಗಾಬರಿಯಾಗಿದ್ದಳು .  ಎಲ್ಲಿ ಮುಟ್ಟಬಹುದು ಇದು ಎಂಬ ಯೋಚನೆ . 

ಎರಡು ನಿದ್ರೆಯಿಲ್ಲದ ರಾತ್ರಿಗಳನ್ನು , ಕಳೆದ ಮೇಲೆ , ಕೊನೆಗೊಮ್ಮೆ ಅವನನ್ನು ಭೇಟಿ ಆಗುವುದೇ  ಒಳ್ಳೆಯದು ಎಂದು ತೀರ್ಮಾನಿಸಿದ ಅಂತೂ ನಿದ್ರೆ ಮಾಡಿದಳು . ಬೆಳಗಾದ ಮೇಲೂ ಅವನು ಅವಳ  ತಲೆಯಲ್ಲಿ ಸುತ್ತುತ್ತಲೇ ಇದ್ದ .  ಅಂಥಾ ಸಂದರ್ಭ ಬಂದರೆ  " ನೋಡು , ನನ್ನ ಲೈಫ್ ಲ್ಲಿ  ಏನೇನೋ ಆಗಿ ಹೋಗಿದೆ . ಯಾವ ಸಂಬಂಧಗಳ ಬಗ್ಗೆಯೂ  ನಂಬಿಕೆ ಇಲ್ಲದ  ಸ್ಥಿತಿ ಗೆ ಬಂದಿದ್ದೇನೆ . ಯಾರನ್ನೂ  ಜೀವನದಲ್ಲಿ  ಇನ್ನು ಹಚ್ಚಿ ಕೊಳ್ಳಬಾರದು ಅಂತ  ತೀರ್ಮಾನ ಮಾಡಿದೀನಿ . ಆದರೂ ನೀನು ಹೇಗೆ  ಹತ್ತಿರ ಆಗ್ಬಿಟ್ಟೆ ಅಂತ  ಗೊತ್ತಿಲ್ಲ . ನೋಡು , ಇದು ಸ್ನೇಹ ಅಂತಾದ್ರೆ , ಇಷ್ಟರಲ್ಲೇ ಇರಲಿ . ಇನ್ನೂ ಹತ್ತಿರ ಆಗಬೇಕು ಅನ್ನೋ  ವಿಚಾರ ಎಲ್ಲ ಇದ್ರೆ ,  ಅಲ್ಲಿಗೆ ಬಿಟ್ಟು ಬಿಡೋದು ಒಳ್ಳೇದು  . ಇಲ್ಲ ಅಂದ್ರೆ , ಖಾಯಂ ಆಗಿ ಮಾತಾಡೋದು ನಿಲ್ಲಿಸಬೇಕಾಗತ್ತೆ . "   ಇದೆಲ್ಲವನ್ನೂ ಯಾವ ಭಾವನೆಯನ್ನೂ  ತೋರಿಸದೆ , ಅವನಿಗೆ ಹೇಳುವ ಬಗೆಯನ್ನು ಯೋಚಿಸುತ್ತಿದ್ದಳು . 
ಶುಕ್ರವಾರ ರಾತ್ರಿ ನಿದ್ರೆಯಿಲ್ಲದೆ ಕಳೆಯಿತು  ! ಶನಿವಾರದ  ಮಧ್ಯಾಹ್ನದವರೆಗೂ  ಮನೆಯಲ್ಲಿ ಕೆಲಸಗಳನ್ನು ಹೇಗೆ ಮುಗಿಸಿದಳೋ ಅವಳಿಗೆ ಗೊತ್ತು . ಸಂಜೆ ೫ ರ ಹೊತ್ತಿಗೆ ರೆಡಿಯಾಗುವಾಗ ಎದೆಯಲ್ಲಿ ವಿಚಿತ್ರ ಭಾವಗಳು ! 
ಕಪಾಟಿನಿಂದ   ಸೀರೆ ತೆಗೆಯುವಾಗ  ಒಮ್ಮೆ ದ್ವಂದ್ವ ! ಅವನು ಹೇಳಿದ ಅಂತ  ತಾನು ಉಡಬೇಕೇ  ಎಂಬ ಪ್ರಶ್ನೆ  ಕಾಡಿದಾಗ  ಕೊನೆಗೆ ಮರೂನ್  ಸೀರೆ ಉಟ್ಟಳು . ಅಂತೂ ತಯಾರಾಗಿ  ಹೊರಡುವ ಮೊದಲು ಕನ್ನಡಿ ನೋಡಿದಾಗ  ಬಿಂಬ ಸುಂದರವಾಗೇ ಕಾಣಿಸಿತು . 

ಸಿಟಿ ಸೆಂಟರ್ ಎದುರು ಟ್ಯಾಕ್ಸಿ ನಿಂತಾಗ 6.45.  ಮೊದಲ ಭೇಟಿಗೆ ಲೇಟ ಆಯ್ತಾ ಅಂದುಕೊಂಡವಳಿಗೆ , 
ಇದು ಕೊನೆಯ ಭೇಟಿಯೂ ಆಗಬಹುದಲ್ವಾ ಎಂಬ  ವಿಚಾರವೂ ತಲೆಯಲ್ಲಿ ಸುಳಿಯಿತು . ಬುಕ್ ಕೆಫೆ ಯ ಎದುರು ನೀಲಿ ಟಿ ಶರ್ಟ್  ಕಂಡಾಗ ಎದೆಬಡಿತ  ಅವಳಿಗೆ ಕೇಳುತ್ತಿತ್ತು. ಅವಳನ್ನು ನೋಡುತ್ತಲೇ   ಅವನ ಮುಖದಲ್ಲಿ ತುಂಬಿದ ನಗು ದೂರದಿಂದಲೇ  ಕಾಣುತ್ತಿತ್ತು . 
" ಸಾರಿ , ಸ್ವಲ್ಪ ಲೇಟ್ ಆಯ್ತು ."
"ಹೊ ಪರವಾಗಿಲ್ಲ ಬಿಡಿ . 10-15 ನಿಮಿಷ ಅಷ್ಟೇ . ನಾನೂ ಲೇಟ ಲತೀಫ್ ಒಂಥರಾ. ಆದರೆ ಇವತ್ತು ನಿಮ್ಮನ್ನು ಮೀಟ್ ಮಾಡ್ಬೇಕಲ್ವಾ ಅಂತ ಟೈಮ್ ಗೆ ಬಂದೆ ಅಷ್ಟೇ . ಫಸ್ಟ್ ಇಂಪ್ರೆಷನ್ ಹಾಳಾಗಬಾರದು ನೋಡಿ ! "  ಮುಕ್ತವಾಗಿ ನಕ್ಕ . ಅವಳ ಟೆನ್ಷನ್ ಕಮ್ಮಿ ಆಯ್ತು .  
ತೀರಾ ಚಂದದವ  ಎನ್ನಲಾಗದಿದ್ದರೂ ಒಂಥರಾ ಆಕರ್ಷಣೆ  ಇತ್ತು ಅವನ  ನಗುವ ಕಣ್ಣಲ್ಲಿ ! 
ಕಾಫಿ ಕುಡೀತಾ ಮಾತಾಡೋಣ್ವ ?  ಅಥವಾ ಐಸ್ ಕ್ರೀಮ್ ?

ಕಾಫೀ ಶಾಪ್ ನ ಮೂಲೆಯ  ಟೇಬಲ್  ನಿಂದ  ಹೊರಗಡೆಯ  ಗಾರ್ಡನ್ ಸುಂದರವಾಗಿ ಕಾಣುತ್ತಿತ್ತು . 
  
"ನೀವು ಬರ್ತಿರೋ ಇಲ್ವೋ ಅಂತ ಅನುಮಾನ ಇತ್ತು . ನಾನೇನೋ ಹೇಳ್ಬಿಟ್ಟೆ ಬನ್ನಿ  ಮೀಟ್ ಮಾಡೋಣ ಅಂತೆಲ್ಲ . ಆದರೆ ನೀವು ಅದನ್ನ ಹೇಗೆ ತೊಗೋತೀರಾ ಅಂತ ಗೊತ್ತಿಲ್ವಲ್ಲ "  

" ಹಾಗೇನಿಲ್ಲ , ಬಟ್  ಒಂದ್ಸಲ ಗೊಂದಲ ಆಯ್ತು ನಂಗೆ " 
"  ಸಹಜ ರೀ . ಇದ್ದಕ್ಕಿದ್ದಂಗೆ  ನಾನು ಬಡ ಬಡಾ ಅಂತ  ಇಲ್ಲಿ ಬನ್ನಿ  ಭೇಟಿ  ಆಗೋಣ ಅದೂ ಇದೂ ಅಂತೆಲ್ಲ ಅಂದ್ರೆ.. ಗಾಬರಿ ಆಗೋದೇ . ಏನಪಾ ಇವನು  ಏನೋ ನಾಲ್ಕು ಮಾತಾಡಿದ್ದೆ ಕಾಫಿ ಗೆ ಕರೀತಾನೆ ಅಂತ ಅಂದ್ಕೊತೀರೇನೋ  ಅನ್ನೋ ಸಂಶಯ  ಬಂತು ನಂಗೆ    ಹ ಹ ಹ ..   "  ನಕ್ಕಾಗ  ಅವನ ಮುಖವನ್ನೇ ನೋಡಿದಳು 
" ಅಂದಹಾಗೆ,  ಪರವಾಗಿಲ್ಲ ಮರೂನ್ ಸೀರೆ ನೂ ಒಪ್ಪತ್ತೆ ರೀ ನಿಮಗೆ! " 
ಚಾಟ್ ಮಾಡುವಾಗಿಂದಕ್ಕೂ ಎದುರಿಗೆ ಮಾತಾಡೋದಕ್ಕೂ ಏನೂ ವ್ಯತ್ಯಾಸ ಇಲ್ಲ ಎನಿಸಿತು ಅವಳಿಗೆ . 
" ಯಾಕ್ರೀ ? ಮಾತಾಡ್ತಿಲ್ಲ?  ಕೋಪ ಬಂತಾ? ಅಷ್ಟು ಆರಾಮಾಗಿ  ಚಾಟ್ ಮಾಡ್ತೀರಿ  ಎದುರಿಗೆ ಯಾಕ್ರೀ ಮೌನಗೌರಿ ?  "
"ಹಾಗೇನಿಲ್ಲ , ಏನು ಮಾತಾಡ ಬೇಕು ಅಂತ ಗೊತ್ತಾಗ್ತಿಲ್ಲ " 
" ಕರ್ಮಾ !  ಹ ಹ ಹ  ..  ಒಂದ್ ಮಾತ್ ಹೇಳಲಾ ? ಏನು ಗೊತ್ತ ? ನೀವು  ಫೋಟೋದಲ್ಲಿ ಹೇಗೆ ಕಾಣಿಸ್ತೀರೋ  ನಿಜಕ್ಕೂ ಹಾಗೆ ಇದ್ದೀರಾ ! " 
" ಅರೆ ? ಅದರಲ್ಲೇನ್   ಆಶ್ಚರ್ಯ ? ನಂದೇ  ತಾನೇ ಫೋಟೋ? ಮತ್ತೆ, ನಾನು ಹೇಗಿದೀನೋ ಹಾಗೆ ಬರತ್ತೆ ! " 
"ಆ ತರ ಅಲ್ಲಾ ರೀ , ತುಂಬಾ ಜನ ಚೆನ್ನಾಗಿ ಬಂದಿರೋ ಫೋಟೋಗಳನ್ನ ಮಾತ್ರ ಹಾಕ್ತಾರೆ , ಅಥವಾ ಹಳೆ ಫೋಟೋಗಳನ್ನ ಹಾಕ್ತಾರೆ  ಅಥ್ವಾ ತಿದ್ದಿ ತೀಡಿ ಚೆನ್ನಾಗಿ  ಕಾಣಿಸೋ ತರಾ ಮಾಡಿ ಹಾಕ್ತಾರೆ . ಆದ್ರೆ , ನಿಮ್ಮ ಫೋಟೋಕ್ಕೂ ನೀವು ನಿಜವಾಗಿ ಇರೋದಕ್ಕೂ ವ್ಯತ್ಯಾಸ ಇಲ್ಲ ಅಂತ ಹೇಳಿದ್ದು " 
" ಹ ಹ್ ಹಾ , ನಾನ್ಯಾಕೆ ತಿದ್ದಿ ತೀಡಿ ಹಾಕ್ಕೋಬೇಕು ಫೋಟೋ ನ ?  ನಾನೇನು ಗಂಡು ಹುಡುಕ್ತಿಲ್ವಲ್ಲ  ?  "  ಹೇಳಿದವಳು ನಾಲಿಗೆ ಕಚ್ಚಿಕೊಂಡಳು 
" ಅಂತೂ ಈಗ ಸಲ್ಪ ಆನ್ಲೈನ್ ಲೆವೆಲ್ ಗೆ ಬರ್ತಿದೀರಾ "  ಮತ್ತೊಮ್ಮೆ ನಕ್ಕ ಅವನು ! 
ಅದು ಹೇಗೆ ಅಷ್ಟು ಕೂಲಾಗಿದಾನೆ  ತಾನೇ ಏನೋ ಕಲ್ಪಿಸಿಕೊಂಡು  ಸುಮ್ಮನೆ ಟೆನ್ಷನ್ ತೊಗೊಂಡೆ  ಎನಿಸಿ ನಿರಾಳ ವಾದಳು 
ಹರಟೆ  ಮುಂದುವರಿಯಿತು . 
ಎರಡು ಕಾಫಿ ಆದಮೇಲೆ , ಅವನು ಸ್ವಲ್ಪ ಸೀರಿಯಸ್  ಆದ. 
" ನಿಮ್ಮತ್ರ  ಒಂದು ವಿಷಯ ಮಾತಾಡ್ಬೇಕು . ಆದರೆ ನೀವು ಹೇಗೆ ರೆಸ್ಪೋನ್ಡ್ ಮಾಡ್ತೀರಾ ಅಂತ ಗೊತ್ತಿಲ್ಲ . "
ಅವಳು  ಉಸಿರು ಬಿಗಿ ಹಿಡಿದಳು . ಇಷ್ಟೊತ್ತು  ಆರಾಮಾಗಿದ್ದ ವಾತಾವರಣ  ಒಮ್ಮೆಲೇ ಬದಲಾದಂತೆನಿಸಿತು . 

" ನೋಡಿ , ತುಂಬಾ ದಿನದಿಂದ  ತಲೇಲಿ  ವಿಚಾರಗಳು ಬರ್ತಿದ್ವು .. .  ನಾವಿಬ್ರೂ ಇಷ್ಟು ದಿನದಿಂದ  ಹರಟೆ ಹೊಡಿತೀವಿ , ಒಬ್ಬರನ್ನೊಬ್ಬರು ನೋಡದೇನೆ  , ಆದರೂ ಏನೋ ಆತ್ಮೀಯತೆ, ಸ್ನೇಹ ಸಲುಗೆ  ,ನಿಮ್ಮನ್ನ  ಒಂದ್ಸಲ  ನೋಡಬೇಕು ,ಭೇಟಿ ಆಗಬೇಕು   ಅಂತ  ಒಮ್ಮೆಲೇ ಅನಿಸೋಕೆ ಶುರುವಾಯ್ತು .   
ನಿಮ್ಮ ಬಗೆಗಿನ ನನ್ನ ಫೀಲಿಂಗ್ಸ್ ಬಗ್ಗೆ  ನಂಗೆ  ಅನುಮಾನ ಬರೋಕ್ ಶುರುವಾಯ್ತು.  ಅದಕ್ಕೆ , ಒಂದ್ಸಲ ಎದುರು ಬದುರು ಕೂತು ಮಾತಾಡಿದ್ರೆ  ಬಹುಶಃ ಕ್ಲಿಯರ್ ಆಗಬಹುದು ಅನಿಸ್ತು . ಅದಕ್ಕೆ  ಕರೆದಿದ್ದು . ಯಾವುದೇ  ಆಗಲಿ ನನ್ನ ತಲೇಲಿ ಕೊರೆಯೋಕೆ ಶುರುವಾದ್ರೆ ,  ಆದಷ್ಟು ಬೇಗ ಕ್ಲಿಯರ್ ಮಾಡ್ಕೊಳೋದು ನನ್ನ ಸ್ವಭಾವ . . ದಯವಿಟ್ಟು ತಪ್ಪು ತಿಳ್ಕೊಬೇಡಿ " 

ಏನು ಹೇಳಬೇಕೋ ಅವಳಿಗೆ  ಗೊತ್ತಾಗಲಿಲ್ಲ ., ತನಗನಿಸಿದ್ದು ನಿಜವಾಯ್ತಾ ಅನ್ನೋ  ಭಯ ಕಾಡೋಕೆ ಶುರುವಾಯ್ತು .  ತನ್ನದಲ್ಲದ ಸ್ವರದಲ್ಲಿ ಕೇಳಿದಳು 
" ಸೊ, ಈಗ  ಏನನಿಸ್ತಿದೆ ನಿಮಗೆ ? " 
ಅವನು  ಟೇಬಲ್ ನಲ್ಲಿ ಸ್ವಲ್ಪ ಮುಂದೆ ಬಾಗಿ ಅವಳ ಕಣ್ಣಲ್ಲಿ ಕಣ್ಣಿಟ್ಟು  ಮೆಲ್ಲಗೆ  ಹೇಳಿದ 
" ಏನಿಲ್ಲ . ಇನ್ನೂ ಒಂದ್ ಕಪ್  ಅಟ್ ಲೀಸ್ಟ್  ಬೈ - ಟು   ಕಾಫಿ  ಕುಡಿಬಹುದೇನೋ  ಅನಿಸ್ತಿದೆ ! "   ಜೋರಾಗಿ ನಕ್ಕವನನ್ನು ಕೊಂದು  ಹಾಕುವಷ್ಟು ಕೋಪ ಬಂತು ಅವಳಿಗೆ ! 
 ಅವನೇನು  ಹೇಳ್ತಾನೋ ಅಂತ ತನ್ನ  ಬಿ ಪಿ ಏರ್ತಾ ಇದ್ರೆ  ಇವನು ಕಾಫೀ  ಅಂತಿದಾನಲ್ಲ ! 

" ಹ ಹ ಹಾ .. ಸಾರಿ ಕಣ್ರೀ. ಕೋಪ ಮಾಡ್ಕೋಬೇಡಿ .  ನಿಮ್ಮಲ್ಲಿ ಒಬ್ಬ ಒಳ್ಳೆ ಸ್ನೇಹಿತೆ  ಕಾಣಿಸ್ತಿದಾಳೆ  ನಂಗೆ . ನಿಮ್ಮ ಹತ್ರ  ಏನು ಬೇಕಾದರೂ ಹಂಚಿಕೊಳ್ಳೋ ಸಲುಗೆ ಇದೆ . ತುಂಟತನ  ಮಾಡಬಹುದು , ವಾದ ಮಾಡಬಹುದು , ಜಗಳ ಕೂಡ ಮಾಡಬಹುದು !  ಆಗೆಲ್ಲಾ ನೀವು  ಸಿಟ್ಟು ಮಾಡ್ಕೋತೀರಾ , ಬೈತೀರಾ ,ಸರಿ ತಪ್ಪುಗಳ ಬಗ್ಗೆ ಚರ್ಚೆ ಮಾಡ್ತೀರಾ   ಆದರೆ  ನನ್ನ ಜಡ್ಜ್ ಮಾಡೋಲ್ಲ ,  ಅನ್ನೋ ವಿಶ್ವಾಸ ಇದೆ .  ಈ ಸ್ನೇಹಾನಾ ಹೀಗೆ  ಜೀವನ ಪರ್ಯಂತ ಇಟಗೋಬೇಕು ಅನ್ನೋ ಆಸೆ ಇದೇರಿ .  ಸ್ನೇಹ  ಪ್ರೀತಿಯ ರೂಪ  ಪಡೆದ  ಕೂಡಲೇ ಅದನ್ನ  ಕಳ್ಕೊಳೋ ಚಾನ್ಸ್ ಜಾಸ್ತಿ  ಅಂತ ನನ್ನ ನಂಬಿಕೆ . ನಮ್ಮ  ಎಕ್ಸ್ಪೆಕ್ಟೇಷನ್ಸ್  ಹೆಚ್ಚಾಗೋಕೆ ಶುರುವಾಗತ್ತೆ  ,  ಅದಕ್ಕೆ , ಸ್ನೇಹಾನೂ ಪ್ರೀತಿನೂ  ಮಿಕ್ಸ್ ಮಾಡದೇ ಬೇರೆ ಬೇರೇನೇ  ಇಟ್ಕೋಳೋದು ಒಳ್ಳೇದು ಅನ್ಸತ್ತೆ ನಂಗೆ . ನೀವೇನಂತೀರಾ?  ನೀವೇನೂ ನನ್ನ ಬಗ್ಗೆ  ಪ್ರೀತಿ ಪ್ರೇಮ  ಅಂತೆಲ್ಲ ಕನಸು ಕಟ್ಟಿಲ್ಲ ತಾನೇ ? " 

ಅವಳ ಮುಖ ಕೆಂಪಾಯ್ತು !  ತಾನು  ಹೇಗೆ ಹೇಳಬೇಕಪ್ಪಾ  ಎಂದು ಯೋಚನೆ ಮಾಡಲೂ  ಕಷ್ಟ ಪಡುತ್ತಿದ್ದ ವಿಷಯನಾ ಅವನು ಇಷ್ಟು ಸುಲಭವಾಗಿ  ಸರಳವಾಗಿ ಹೇಳಿದ ಬಗ್ಗೆ ಅಸೂಯೆ ಆಯ್ತು 
" ಹೋಗ್ರೀ, ನಾನ್ಯಾಕೆ  ಹಾಗೆಲ್ಲ ಕನಸು  ಕಾಣಬೇಕು ? ಹೋಗಿ ಹೋಗಿ ನಿಮ್ಮನ್ನ  ಲವ್ ಮಾಡೋ  ಸ್ಟುಪಿಡ್ ಅಲ್ಲ ನಾನು ! ಇನ್ ಫ್ಯಾಕ್ಟ್ , ನೀವು ಆ ವಿಷಯ ಎತ್ತಿದ್ರ್ , ಹೇಗಪ್ಪಾ ತಪ್ಪಿಸಿಕೊಳ್ಳೋದು, ಏನು ಉತ್ತರ ಕೊಡೋದು ಅಂತ ತಲೆಬಿಸಿ ಮಾಡ್ಕೊಂಡಿದ್ದೆ  ಅಷ್ಟೇ "  ಅಂತ ನಾಲಿಗೆ ಚಾಚಿದಳು . 

" ಸೊ ? ಡೀಲ್ ?  ನಾವಿಬ್ರೂ ಹೀಗೆ  ಬೈಕೊಂಡು, ಜಗಳ ಆಡಿಕೊಂಡು ಸ್ನೇಹಿತರಾಗೇ ಇರೋಣ . ಏನಂತೀರಾ?  "
ಜೊತೆಗೂಡಿದ ನಗುವಿನಲ್ಲಿ ಮುಕ್ತ ವಿಶ್ವಾಸವಿತ್ತು !